ევროკავშირის წევრი ქვეყნები ცალსახად მხარს უჭერენ საქართველოს საკითხს და შეიძლება ითქვას, რომ აქ არანაირი აცდენა არ არსებობს ევროკავშირის პოზიციასა და ევროკომისიის რეკომენდაციას შორის, – ამის შესახებ საქართველოს პარლამენტის ევროინტეგრაციის კომისიის თავმჯდომარემ, მაკა ბოჭორიშვილმა „ქრონიკაში“ განაცხადა.
„ეს არის ძალიან მნიშვნელოვანი გადაწყვეტილება, ბუნებრივია, როგორც საქართველოსთვის, ჩვენ ამ გადაწყვეტილებას ველით, ასევე თავად ევროკავშირისთვის, ვინაიდან, საკითხი, რასაც განიხილავენ ევროკავშირის ლიდერები რეალურად არის ის თემა, რამაც უნდა განსაზღვროs, თუ როგორი იქნება ევროკავშირი მომავალში. რა შემადგენლობით იქნება და როგორი უნდა იყოს მომავალი ათწლეულები ევროკავშირისთვის. შესაბამისად, ბუნებრივია რამხელა პასუხისმგებლობაა ამ გადაწყვეტილების მიღება და ბუნებრივია, რომ არ არის ასეთი გადაწყვეტილების მიღება მარტივი. ლიდერებიც შესაბამისადვე განსაკუთრებული სიფრთხილითა და გულისყურით განიხილავენ ნებისმიერ საკითხს, რაც მომავალში ევროკავშირის გაფართოებას უკავშირდება. საკითხის მნიშვნელობიდან გამომდინარე გვესმის რაღაც განცხადებები, რაც ვრცელდება თუმცა, ერთი რამ არის ფაქტი, რომ ფაქტობრივად, ევროკავშირის წევრი ყველა სახელმწიფო არის გაფართოების მომხრე და ეს არის ის საკითხი, რომელზეც არსებობს ევროკავშირში კონსენსუსი, როგორც პრინციპზე, რომ ეს უნდა მოხდეს. ევროკავშირის წევრმა ქვეყნებმა უნდა იმუშაონ იმისათვის, რომ მომავალში ევროკავშირი იყოს არა 27-ზე მეტი სახელმწიფოსგან, არამედ 30-ზე მეტი სახელმწიფოსგან შემდგარი. თუმცა, ჩვენთვის საქართველოსთან დაკავშირებული საკითხია განსაკუთრებული მნიშვნელობის ამ პროცესში. ჩვენთვის საყურადღებო პირველ რიგში არის ის განცხადებები, რაც კეთდება. უმეტესად როგორც გვესმის, ეს არის პოზიტიური განცხადებები. ევროკავშირის წევრი ქვეყნები ცალსახად მხარს უჭერენ საქართველოს საკითხს და შეიძლება ითქვას, რომ აქ არანაირი აცდენა არ არსებობს ევროკავშირის პოზიციასა და ევროკომისიის რეკომენდაციას შორის, რომელმაც სულ რაღაც 1 თვის წინ გასცა ევროკომისიამ“, – აღნიშნა ბოჭორიშვილმა.