მგონი, „ნაცმოძრაობაშიც“ საუბრობენ, რომ მათი მოწონება შემცირებულია მათსავე ამომრჩეველში, საერთო ჯამში, „ნაციონალური მოძრაობის“ დასუსტება გულისხმობს ქართული დემოკრატიის გაძლიერებას, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისი თქმით, „ნაციონალური მოძრაობის“ პრობლემა არ არის ადამიანებში, არამედ მათი პრობლემაა, რომ მოქმედებენ ქართველი ხალხის ინტერესების წინააღმდეგ.
„რაც უფრო დასუსტდება „ნაციონალური მოძრაობა“, მით მეტად გაძლიერდება ქართული დემოკრატია. ამიტომ, ხედავთ, რომ ამ გზაზე ვართ. „ნაციონალურ მოძრაობაში“ არ ვგულისხმობ პარტია „ნაციონალურ მოძრაობას“ ფორმალურად. ვგულისხმობ ყველა მის დაჯგუფებას. რადიკალურ ფრთა „ლელოს“, ნაკლებად რადიკალურ ფრთას, გახარიას და ა.შ. ყველა ეს დაჯგუფება ერთი ქოლგის, „ნაციონალური მოძრაობის“ იდეოლოგიის ქვეშ არის გაერთიანებული. „ნაციონალური მოძრაობის“ პრობლემა არ არის ადამიანებში, თავმჯდომარე ვინ იქნება, პოლიტსაბჭოს მდივანი და წევრი, პრობლემა არის მთავარ რამეში, რომ ეს არის პოლიტიკური გაერთიანება, რომელიც მოქმედებს ქართველი ხალხის ინტერესების წინააღმდეგ და ემსახურება ქვეყნის გარეთ არსებულ სხვადასხვა ჯგუფებს. ეს არის პრობლემა. ამიტომ, ვიდრე ამ პოლიტიკურ ფილოსოფიაზე იქნებიან დაფუძნებული, რომელიც ძალადობას და სხვა ქვეყნის ინტერესების მსახურებას გულისხმობს, რა თქმა უნდა, მათი შედეგი იქნება ყოველთვის ასეთი“, – განაცხადა პაპუაშვილმა.