მიუნხენის უსაფრთხოების კონფერენციის ფარგლებში სიტყვით გამოვიდა ბელარუსის ოპოზიციის ლიდერი, სვეტლანა ტიხანოვსკაია. ის ალქესეი ნავალნის ციხეში სიკვდილს გამოეხმაურა და ცივილიზებული სამყაროს ლიდერებს მოუწოდა, სერიოზულად მოეკიდონ დიქტატორების იზოლაციის საკითხს. მისი თქმით, სანამ ლუკაშენკოს რეჟიმი იარსებებს, რეგიონი უსაფრთხო არ იქნება.
“ჩვენ ეჭვი არ გვეპარება, ვინ არის პასუხისმგებელი ნავალნის სიკვდილზე. ის პუტინის რეჟიმმა მოკლა. ეს არის შეხსენება მთელი მსოფლიოსთვის, რომ დიქტატორები არაფერზე ჩერდებიან. დემოკრატიულმა სამყარომ სიმამაცის დემონსტრირება უნდა მოახდინოს. პასუხი სისასტიკეზე უნდა იყოს გადამწყვეტი.
ჩვენ გვეშინია ათასობით ბელარუსი პოლიტპატიმრის სიცოცხლის. ბევრი მათგანი დაკავებულია გარე სამყაროსთან კონტაქტის გარეშე. არ ვიცით ცოცხლები არიან თუ არა. არ შეიძლება ციხეებში ახალი სიკვდილიანობის დაშვება.
ჩვენ გვჭირდება ორი დიქტატორის იზოლირება, მათ უნდა გამოვაცალოთ რესურსები და ვაიძულოთ, რომ გადაიხადონ ყველა დანაშაულისთვის რომელიც ჩაიდინეს უკრაინელების, ბელარუსების, მსოფლიო მშვიდობისა და წესრიგის წინაშე.
ამ რთულ ბრძოლაში გასამარჯვებლად, ჩვენ გვჭირდება სტრატეგია და მოქმედების კონკრეტული გეგმა და იმედი მაქვს ამ დისკუსიების დროს მოვისმენ კონკრეტულ იდეებს, რომლებიც დაგვეხმარება ბელარუსის დემოკრატიისკენ და ევროპაში მშვიდობის აღდგენაში” განაცხადა ტიხანოვსკაიამ.
ამის შემდეგ ის ალექსეი ნავალნის ცოლს, იულია ნავალნაიას შეხვდა. ნავალნაიამ ქმრის სიკვდილის შესახებ სწორედ მიუნხენში შეიტყო და ამის მიუხედავად, კონფერენციაზე სიტყვით მაინც გამოვიდა.