დეკანოზ გიორგი მამალაძის ადვოკატი მიხეილ რამიშვილი იმ მიზეზებზე საუბრობს, თუ რატომ არ შედგა დეკანოზის დაკითხვა. ადვოკატის თქმით, შედგა ოქმი, სადაც გიორგი მამალაძე ამბობს, რომ წინა დაკითხვის დროს სრულად მისცა ჩვენება მის ორივე ბრალდებასთან დაკავშირებით, როელიც ეხება მკვლელობის მომზადების მცდელობას და იარაღის შენახვას.
იმ კრიტიკულ შეკითხვებზე კი, რომელიც საპატრიარქოს ეხება, გარკვეულ ეტაპზე მისცა ჩვენებები, დამატებით ჩვენებებზე კი უარი განაცხადა.
“მან ჩვენებაზე უარი განაცხადა ერთი მიზეზით, რაც ოქმშიც არის მითითებული, რომ ჩვენებაში დასახელებული ყავს პირები, რომლებიც მასზე გარკვეული ფორმით ახორციელებენ მუქარას და ზეწოლას. მან მოითხოვა, რომ თუ სურთ ე.წ კრიტიკულ შეკითხვებზე პასუხის გაცემა, მაშინ უზრუნველეყოთ მისი ოჯახის წევრების უსაფრთხოება, რადგან ჩვენებაში ზუსტად არის ნათქვამი, ვისგან რა მუქარას ჰქონდა ადგილი”, – განაცხადა რამიშვილმა და აღნიშნა, რომ დეკანოზის ოჯახის წევრებში იგულსიხმება მისი დედა, მამა, მეუღლე, შვილები, ძმა და ძმის ოჯახი.
ადვოკატი ამბობს, რომ გამოძიების დასადგენია, თუ ვინ ემუქრება დეკანოზის ოჯახს. მისივე თქმით, დეკანოზის ჩვენებაში ნახსენებია როგორც საერო, ისე სასულიერო პირები.