ევროპასა და ჩინეთს მშვიდობისა და უსაფრთხოების საერთო ინტერესი აქვთ, – განაცხადა ევროკომისიის პრეზიდენტმა, ურსულა ფონ დერ ლაიენმა ჩინეთის პრეზიდენტთან, სი ძინპინთან გამართული შეხვედრის შემდეგ.
„[საფრანგეთის] პრეზიდენტ მაკრონთან ერთად, პირველი თემა, რომელზეც აზრები გავცვალეთ, იყო გეოპოლიტიკური სიტუაცია. ჩვენ განსაკუთრებით განვიხილეთ უკრაინასა და ახლო აღმოსავლეთში კონფლიქტები. ჩვენ ვეთანხმებით, რომ ევროპასა და ჩინეთს მშვიდობისა და უსაფრთხოების საერთო ინტერესი აქვთ. ჩვენ ვიმედოვნებთ, რომ ჩინეთი გამოიყენებს თავის გავლენას რუსეთზე, რათა დაასრულოს რუსეთის აგრესიული ომი უკრაინის წინააღმდეგ. ჩინეთის პრეზიდენტმა მნიშვნელოვანი როლი ითამაშა რუსეთის უპასუხისმგებლო ბირთვული რიტორიკის დეესკალაციაში და დარწმუნებული ვარ, რომ პრეზიდენტი სი გააგრძელებს ამას“, – აღნიშნა ურსულა ფონ დერ ლაიენმა.
„ჩვენ ასევე განვიხილეთ ჩინეთის ვალდებულება არ მიაწოდოს რუსეთს ლეტალური აღჭურვილობა. მეტი ძალისხმევაა საჭირო რუსეთში ორმაგი დანიშნულების საქონლის მიწოდების შესამცირებლად, რომელიც ბრძოლის ველზე ხვდება. და თუ გავითვალისწინებთ ამ ომიდან მომდინარე საფრთხეების ეგზისტენციალურ ბუნებას როგორც უკრაინისთვის, ასევე ევროპისთვის, ეს გავლენას ახდენს ევროკავშირისა და ჩინეთის ურთიერთობებზე“, – დასძინა ევროკომისიის პრეზიდენტმა.