რეალურად თუ ვინ არის ამ აქციების ორგანიზატორი, ახალგაზრდების სახელით რომ ლაპარაკობთ, ბოლო-ბოლო მაინც გამომჟღავნდა და თქვენმა ლიდერმა, “ვივამედის” ბინადარმა სააკაშვილმა გამოთქვა ყველაფერი კარგად, რა არის თქვენი მიზანი. ეს ყველაფერი მართლა სასაცილო იქნებოდა, რომ არა ერთი მნიშვნელოვანი დეტალი – თქვენი ბელადი სააკაშვილი აქცენტს აკეთებს და პარალელს ავლებს 2014 წლის უკრაინის მაიდანზე. ძალიან კარგად გვახსოვს რაც ხდებოდა მაიდანზე, რამდენი ასეული ადამიანის მსხვერპლით დამთავრდა და რაც ხდება დღესაც უკრაინაში, იმის გაგრძელებაა. ომში გინდათ ამ ქვეყნის ჩართვა მდიდარ „ენჯეოებთან“ ერთად, რომელთა ფულების გაუმჭვირვალობის გულისთვისაც დღეს ამ აქციებს აწყობთ, ამას ვერ ეღირსებით ვერასდროს, ამას არ დაუშვებს ქართველი ხალხი, – მიმართა საპარლამენტო პოლიტიკური ჯგუფის „ხალხის ძალა“ თავმჯდომარემ სოზარ სუბარმა ოპოზიციას პარლამენტის პლენარულ სხდომაზე.
სოზარ სუბარის განცხადებით, პარლამენტის დარბაზში დღესაც კარგად გამოჩნდა, რომ ოპოზიციის მიზანი არის დესტრუქცია და ცდილობენ სხდომის ჩაშლას.
მისივე შეფასებით, დღეს ოპოზიციის ქმედებები ყველა ზღვარს გასცდა, დღეს უკვე იმაზე გადავიდნენ, რომ სკოლის მოსწავლეების გამოყვანას ცდილობენ ქუჩაში და და მათ მოუწოდებენ, შეუერთდნენ საპროტესტო აქციას.
„დაანებეთ ბავშვებს თავი, თუ რამის თავი გაქვთ, ქუჩაშიც შეგიძლიათ პროტესტი გამოხატოთ, არჩევნებიც კარს არის მომდგარი და იქ თქვით თქვენი სათქმელი და ბავშვებს ნუ ამოეფარებით, ბავშვებს შეეშვით. ეს არის დანაშაული ჩვენი ქვეყნის წინაშე, მაგრამ ასეთი დანაშაულები არ გიკვირთ, ძალიან ბევრი დანაშაული გაგიკეთებიათ.
თუ ვინ არის რეალურად ამ აქციების ორგანიზატორი, ახალგაზრდების სახელით რომ ლაპარაკობთ, ბოლო-ბოლო მაინც გამომჟღავნდა და თქვენმა ლიდერმა „ვივამედის“ ბინადარმა სააკაშვილმა გამოთქვა ყველაფერი კარგად რა არის თქვენი მიზანი. მომყავს ციტატა: შეცდომა იქნება არჩევნებზე ზედმეტი იმედების დამყარება, არჩევნები არ ჩატარდება ამ ხელისუფლების პირობებში, ამიტომ არჩევნები უნდა ჩაატაროს დროებითმა, გარდამავალმა, ტექნიკურმა მთავრობამ, შემოდგომაზე არჩევნებია შეერთებულ შტატებში და საქართველოსთვის აღარავის ეცლება. ტრამპის გამარჯვების შემთხვევაში, ივანიშვილს იმედი აქვს სანქციები არ ექნება. ილუზიებში ხართ და ეს ადამიანი, მართლა „მასხარა“, იქამდე მივიდა, რომ მომავალი თანამდებობების განაწილებაც კი დაიწყო.
ეს ყველაფერი მართლა სასაცილო იქნებოდა, რომ არა ერთი მნიშვნელოვანი დეტალი – რეალურად თქვენი ბელადი სააკაშვილი აქცენტს აკეთებს და პარალელს ავლებს 2014 წლის უკრაინის მაიდანზე. ძალიან კარგად გვახსოვს რაც ხდებოდა მაიდანზე, რამდენი ასეული ადამიანის მსხვერპლით დამთავრდა და რაც ხდება დღესაც უკრაინაში, იმის გაგრძელებაა. ომში გინდათ ამ ქვეყნის ჩართვა მდიდარ „ენჯეოებთან“ ერთად, რომელთა ფულების გაუმჭვირვალობის გულისთვისაც დღეს ამ აქციებს აწყობთ. ამას ვერ ეღირსებით ვერასდროს, ამას არ დაუშვებს ქართველი ხალხი“, – განაცხადა სოზარ სუბარმა და „ენჯეოების“ შესახებ ისაუბრა.
„2018 წელს სამმა დიდმა ენჯეომ – „სამართლიანმა არჩევნებმა“, ახალგაზრდა იურისტთა ასოციაციამ და „საერთაშორისო გამჭვირვალობამ“ გაავრცელეს ტყუილი თითქოს დაიბეჭდა რამდენიმე ათასი ყალბი პირადობა და იმით იგეგმებოდა სალომე ზურაბიშვილის არჩევნების გაყალბება. 2020 წელს „სამართლიანმა არჩევნებმა“ გააყალბა ხმების პარალელური დათვლა და ცდილობდნენ დესტაბილიზაციას და რევოლუციის მოწყობას. 2022 წელს ყველა ეს ადამიანი იდგა პარლამენტის წინ და ითხოვდა იმას, რასაც დღეს სააკაშვილი ითხოვს – დროებით მთავრობას, ტექნიკურ მთავრობას, რომელშიც ისევ თვითონ შევიდოდნენ. თუ რამე გინდათ ჩამოყალიბდით პარტიებად, „ენჯეოებს“ მივმართავ, ოქტომბრის არჩევნები ახლოსაა და იქ გამოჩნდება რა წონა გაქვთ და შეეშვით ქვეყნის რყევას და საქართველო აუცილებლად გაიმარჯვებს და ეს კანონი იქნება მიღებული იმიტომ, რომ ეს კანონი სჭირდება საქართველოს“, – განაცხადა „ხალხის ძალის“ ლიდერმა.