ისრაელმა იცოდა, რომ კონკრეტული თავდასხმის ადგილებში ჰუმანიტარული დახმარების თანამშრომლები იმყოფებოდნენ. ამის შესახებ „ჰიუმან რაითს ვოჩის“ მიერ გამოქვეყნებულ ანგარიშშია ნათქვამი.
ანგარიშში მოყვანილია რვა კონკრეტული თავდასხმა, რომლის შედეგადაც სულ მცირე 15 ადამიანი გარდაიცვალა, მათ შორის ორი ბავშვი.
როგორც ანგარიშშია აღნიშნული, ისრაელმა იცოდა, რომ იმ კონკრეტულ ადგილებში ჰუმანიტარული დახმარების თანამშრომლები იმყოფებოდნენ და არცერთი ორგანიზაციისთვის წინასწარი გაფრთხილება არ გაუცია.
ერთ-ერთ თავდასხმაზე, რომელიც 18 იანვრით თარიღდება, აღნიშნულია, რომ იერიში აშშ-ის წარმოებს საბრძოლო მასალის გამოყენებით განხორციელდა, რომელიც ბრიტანულ კომპონენტებს მოიცავდა. თავდასხმა კი F-16 მოიერიშე თვითმფრინავით განხორციელდა.
„მთავრობები, რომლებიც აგრძელებენ ისრაელისთვის იარაღის მიწოდებას, საფრთხის ქვეშ არიან ,რომ ომის დანაშაულების თანამონაწილენი გახდნენ“,- აღნიშნულია „ჰიუმან რაითს ვოჩის“ მიერ გამოქვეყნებულ ანგარიშში.
როგორც ირკვევა, ისრაელის მიერ განხორციელებულმა რვა თავდასხმამ გამოავლინა ფუნდამენტური ხარვეზები ე.წ. კონფლიქტების მოგვარების სისტემაში, რომელიც შექმნილია ამ თანამშრომლების დასაცავად.