საქართველოს ნაკრებმა კარგად ითამაშა თურქეთის ნაკრებთან. ისეთი გოლები გაგვიტანა თურქეთის ნაკრებმა, აუღებელი დარტყმები იყო, – ამის შესახებ საქართველოს ეროვნული საფეხბურთო ნაკრების ყოფილმა თავდამსხმელმა გიორგი დემეტრაძემ გადაცემა „დღის ქრონიკაში“ განაცხადა.
მისივე თქმით, საქართველოს ნაკრები არ იქნება ხელწამოსაკრავი დანარჩენ ორ თამაშში.
„შეგვეძლო ბოლოს გაგვეთანაბრებინა მატჩი და დაგვესრულებინა ფრედ, ეს იქნებოდა უფრო სამართლიანი, მაგრამ, სამწუხაროდ, მესამე ბურთი მივიღეთ უკვე ბოლო წუთზე.
მოლოდინი, როგორც მთელს საქართველოს, ალბათ მქონდა, რომ საქართველო ითამაშებდა კარგად და წარმატებას მივაღწევდით. ყოველ შემთხვევაში, თამაშს არ დავთმობდით, მაგრამ მოხდა ისე, რომ სამწუხაროდ, ორი აუღებელი ბურთი გაგვიტანა თურქეთის ნაკრებმა. დაველოდოთ ჩეხეთის ნაკრებთან თამაშს. ჩემი აზრით, წარმატებას მივაღწევთ.
საქართველოს ნაკრებმა კარგი თამაში აჩვენა, როგორც გუნდურად, ისე ფიზიკურადაც კარგად იყო მომზადებული. გვქონდა 100 პროცენტიანი მომენტები, თუმცა, სამწუხაროდ, ბურთი არ შევარდა, ძელს მოხვდა, შემდეგ მცველს მოხვდა. ასე, რომ წასაგები თამაში არ გვქონდა და დარჩენილ ორ თამაშში ალბათ წარმატებას მივაღწევთ.
საქართველოს ნაკრებმა ძალიან რთული გზა გამოიარა. ბოლო თამაშში საკმაოდ ძლიერი საბერძნეთის ნაკრები დაამარცხა და პირველად მოვხვდით ევროპის ჩემპიონატზე. არის გუნდები, რომლებიც ყოველ ევროპის ჩემპიონატზე მონაწილეობენ. ჩვენთვის ეს ევროპის ჩემპიონატზე პირველი თამაში იყო. საქართველოს ნაკრებმა დარჩენილ ორ თამაშში მაქსიმუმი უნდა გააკეთოს, რომ წარმატებას მივაღწიოთ.
რაც შეეხება გამოცდილებას, პირველად ვიყავით ამ ტურნირზე და საქართველოს ნაკრებმა კარგი შთაბეჭდილება დატოვა. ყველამ აღნიშნა საქართველოს ნაკრების თამაში, ყველამ დადებითად შეაფასა. საქართველოს ნაკრები არ იქნება ხელწამოსაკრავი დანარჩენ ორ თამაშში. რაც შეეხება თამაშის ხარისხსაც, საქართველოს ნაკრებმა დაამტკიცა, რომ საკმაოდ სერიოზული გუნდია.
ძალიან მძიმე თამაში გვექნება ჩეხეთთან, ფიზიკურად და ტაქტიკურად ძალიან მაგრად არიან მომზადებულები და სერიოზულ ნაკრებს შევხვდებით. ასე, რომ ადვილი თამაში არ იქნება, მაგრამ მჯერა ჩვენი ნაკრების, რომ წარმატებას მივაღწევთ მაინც“, – აღნიშნა გიორგი დემეტრაძემ.