ძალიან ბევრი ქართველი იყო ჩამოსული გუშინდელ თამაშზე. ბევრმა მათგანმა შეიძლება უკანასკნელი ფინანსებიც გაიღო, რომ ევროპის ჩემპიონატზე ყოფილიყო. რამდენიმე ათასიანი მსვლელობა გვქონდა, – ამის შესახებ „ქართული სპორტის ქომაგების“ დამფუძნებელმა ბექა ნოზაძემ „დღის ქრონიკაში“ განაცხადა.
„ძალიან იმედგაცრუებულები ვართ, რადგან უფრო მეტს ვიმსახურებდით, ვიდრე საბოლოო შედეგი მივიღეთ. ძალიან კარგი თამაში იყო და მთელმა მსოფლიომ, მსოფლიო მედიამ აღიარა, რომ შემთხვევით არ ვართ ტურნირზე, დავიმსახურეთ აქ ყოფნა და აქ თამაში. გუშინ თავი ნამდვილად არ შეგვირცხვენია და თურქეთის ნაკრები არ იყო ის მეტოქე, რომელთანაც უსათუოდ გამარჯვებას დავგეგმავდით. ყოველთვის გამარჯვების სურვილით ვართ ტრიბუნაზე გასული, თუმცა ისიც უნდა ვთქვათ რა დონის გამოცდილება აქვს თურქეთის ნაკრებს, რომელიც ათწლეულებია ასეთი მაღალი დონის ტურნირებზე თამაშობს. თამაშის დილას ერთმანეთს ვეუბნებოდით, თუ რამხელა ზღაპარში და წარმოუდგენელ რეალობაში აღმოვჩნდით. ბევრგან ვყოფილვართ საქართველოს ნაკრების საგულშემატკივროდ, მაგრამ ევროპის ჩემპიონატი სულ სხვა დონეა და არ არის ეს რიგითი გასვლითი მატჩი. აქ უკვე თითოეული წუთი იყო გადამწყვეტი.
გუშინდელი მატჩით არაფერი დასრულებულა. ერთი მოგების შემთხვევაშიც საკმაოდ კარგი შანსი გვაქვს, რომ ევროპის ჩემპიონატი ჩვენთვის მალე არ დასრულდეს და ამ განწყობით ვართ. ძალიან ბევრი ქართველი იყო ჩამოსული გუშინდელ თამაშზე. ბევრმა მათგანმა შეიძლება უკანასკნელი ფინანსებიც გაიღო, რომ ევროპის ჩემპიონატზე ყოფილიყო. რამდენიმე ათასიანი მსვლელობა გვქონდა. ტრიბუნაზე უმცირესობაში ვიყავით, რადგან დორტმუნდში ბევრი თურქი ცხოვრობს, თუმცა თავდახრილები ნამდვილად არ ვყოფილვართ. დავაანონსებთ ჰამბურგშიც და გელზენკირხენშიც შეკრების ადგილს. ჰამბურგში დილის 10:30-დან დავიწყებთ შეკრებას და ზუსტ ლოკაციას დავწერთ“, – აღნიშნა ბექა ნოზაძემ.