წლების მიხედვით ტენდენციები იცვლება, მათ შორის საქართველოშიც. მაგალითად, წლების წინ, მთავარი გამოწვევა იყო ქალბატონების სექსუალური ექსპლუატაცია. საუბარი იყო უცხოელ ქალბატონებზე. ბოლო წლებში ასევე შრომითი ექსპლუატაციის შემთხვევები არის ბევრი, – ამის შესახებ საქართველოს იუსტიციის მინისტრის მოადგილემ, ბექა ძამაშვილმა „დღის ქრონიკაში“ განაცხადა.
„ზოგადად რომ წარმოვაჩინოთ, რა არის ძირითადი მიმართულებები, საქართველოში სექსუალური ექსპლუატაციისა და ტრეფიკინგის მსხვერპლი ხდებიან აზიის სახელმწიფოებიდან შემოსული ქალბატონები. უზბეკეთი, ტაჯიკეთი, ყირგიზეთი. საქართველოს მოქალაქეებს რაც შეეხებათ, ძირითადად მამაკაცები ხდებიან ხოლმე შრომითი ექსპლუატაციის მსხვერპლი ან შესაძლოა საქართველოს მოქალაქეები სხვა ქვეყნებში წავიდნენ და იქ გახდნენ ტრეფიკინგის მსხვერპლი. რაც შეეხება ასაკობრივ მაჩვენებელს, არასრულწლოვანები, ბავშვები უფრო მეტად არიან ხოლმე ჩართული ან პორნოგრაფიაში, ან ხდება ქუჩაში მათი იძულებით გაყვანა შემწეობის სათხოვნელად. ამ შემთხვევაში, ძირითადად არიან ხოლმე საქართველოს მოქალაქეები, თუმცა ასევე ფიქსირდებიან მეზობელი სახელმწიფოების მოქალაქეებიც“, – აღნიშნა ძამაშვილმა.