პირველად ისტორიაში საქართველოს ნაკრები მოხვდა ამხელა ტურნირზე, ვიხილეთ პირველი გოლი, შემდეგ პირველი ქულა. ყველა ელოდა, რომ პირველი გამარჯვებაც იქნებოდა და ეს გამარჯვებაც აჩუქა ჩვენმა გუნდმა გულშემატკივარს და ჩვენს ქვეყანას, – ამის შესახებ საქართველოს ნაკრების ყოფილმა კაპიტანმა, კახა ცხადაძემ „დღის ქრონიკაში“ განაცხადა. მან აღნიშნა, რომ მთელი ქვეყანა ემოციებისგან დაღლილი და გამოფიტულია.
მან აღნიშნა, რომ ნაკრების თამაში გუშინ იყო დაწყნარებული და ფეხბურთელებს ნერვიულობა აღარ ეტყობოდათ, ვილი სანიოლმა კი შემადგენლობა სწორად შეარჩია. ცხადაძე დარწმუნებულია, რომ წინ უფრო მეტი გამარჯვებაა.
„დამერწმუნეთ, ამ ევროპის ჩემპიონატმა ყველას დაანახა, რომ საქართველო არის საფეხბურთო ქვეყანა და არავის ჩამორჩება ტალანტებით. უბრალოდ ჩვენ ცოტანი ვართ, თორემ არც ბრაზილიას ჩამოვრჩებით, არც პორტუგალიას, არც ესპანეთს. ამიტომ უნდა გაგრძელდეს ფეხბურთის დახმარება და უფრო მეტი და მეტი წარმატება იქნება“, – განაცხადა ცხადაძემ.