მერწმუნეთ, იოლი გასეირნება არც ესპანეთს ელის ჩვენთან – ამის შესახებ განცხადება საქართველოს ფედერაციის გენერალურმა მდივანმა დავით მუჯირმა „დღის ქრონიკაში“ გააკეთა.
მისივე თქმით, უკვე გერმანიის მეოთხე ქალაქი უნდა გავაკვირვოთ და შევეცადოთ წარმატებული დღე გვქონდეს.
„ჩვენი მიზანი იყო, რომ 26 მარტის შემდეგ კიდევ არაერთი სასიხარულო დღე გვეჩუქებინა ქართველი გულშემატკივრისთვის. ისევ და ისევ მათი დახმარებით შევძელით და ჯგუფურ ეტაპზე, პირველ შეხვედრებში ღირსეულად ვითამაშეთ. ბოლო შეხვედრაში საჭირო მოგება მოვიპოვეთ ტურნირის ერთ-ერთ მთავარ ფავორიტთან. როგორც ვაანონსებდით, რომ ძალისხმევას არ დავიშურებდით და კიდევ შეგვეძლო, გვქონდა იმის უნარი და ვართ კონკურენტუნარიანი გუნდი ევროპულ დონეზე, დავარწმუნეთ კიდეც ხალხი, ჩვენი თავიც, ფეხბურთელებიც, გულშემატკივრებიც და ვართ მერვედფინალში, ევროპის 16 საუკეთესო გუნდს შორის და მერწმუნეთ, რომ იოლი გასეირნება არც ესპანეთს ელის ჩვენთან.
შესაბამისად, ძალ-ღონეს არ დავიშურებთ ისევე იმ გულშემატკივრის დახმარებით, რომელიც ესწრებოდა თამაშებს ჰამბურგში, დორტმუნდსა და გელზენკირხენში, ახლა კიოლნში გვაქვს თამაში ესპანეთთან და უკვე გერმანიის მეოთხე ქალაქი უნდა გავაკვირვოთ და შევეცადოთ წარმატებული დღე გვქონდეს. 26 მარტის შემდეგ 26 ივნისი გვქონდა და იმედი მაქვს, რომ 30 ივნისსაც მოვახდენთ კიდევ ერთ სენსაციას“, – აღნიშნა მან.