ფინეთის ჯანდაცვის უწყების განცხადებით, მიმდინარე კვირიდან ქვეყანაში იწყება ფრინველის გრიპის პროფილაქტიკური ვაქცინაცია იმ ადამიანებისთვის, ვისაც ცხოველებთან და ფრინველებთან აქვთ კონტაქტი.
როგორც „როიტერი“ ფინეთის ჯანმრთელობისა და სოციალური დაცვის ინსტიტუტზე დაყრდნობით იუწყება, ვაქცინას, უპირველესად, შესთავაზებენ მოსახლეობის იმ ნაწილს, რომელიც, მუშაობის სპეციფიკის ან სხვა გარემოებების გამო, ინფექციის რისკს ექვემდებარება.
ვაქცინა ფრინველის გრიპის ვირუსის H5 ქვეტიპის გავრცელების წინააღმდეგ საბრძოლველად შეიქმნა და ევროკავშირში მისი გაყიდვის ნებართვა მიმდინარე წლის აპრილში გაიცა.
ფინეთმა ვაქცინის დოზები, ევროკავშირის მეშვეობით, 10 000 ადამიანისთვის შეიძინა.
ფრინველის გრიპის H5N1 შტამი ადამიანებში მძიმე დაავადებებს და სიკვდილს იწვევს, თუმცა, ფინეთში ვირუსით ადამიანის დასნებოვნების არც ერთი დადასტურებული შემთხვევა არ დაფიქსირებულა.
H5N1 ვირუსის გამო, ბოლო წლებში მთელ მსოფლიოში ასობით მილიონი ფრინველი დაიღუპა ან შეგნებულად განადგურდა. ეს შტამი სულ უფრო ხშირად ვრცელდება ძუძუმწოვრებში, მათ შორის ძროხებში (შეერთებულ შტატებში) და ზოგიერთ შემთხვევაში -ადამიანებშიც.
ფინეთი ვაქცინაციას ცხოველების ფერმებიდან ინფექციის გავრცელების მაღალი რისკის გამო აპირებს.
„სიტუაცია ფინეთში სრულიად განსხვავებულია, რადგან ჩვენ გვაქვს ბეწვეულის წარმოების ფერმები, სადაც განთავსებულ ცხოველებს, შესაძლოა, ველურ ბუნებასთან ჰქონდეთ კონტაქტი“, – განუცხადა „როიტერს“ ფინეთის ჯანმრთელობისა და კეთილდღეობის ინსტიტუტის მთავარმა ექიმმა, ჰანა ნოჰინეკმა.