ბელარუსის თვითგამოცხადებულმა პრეზიდენტმა, ალექსანდრე ლუკაშენკომ განაცხადა, რომ მესაზღვრეებმა უკრაინის საზღვარზე უსაფრთხოების ზომები გააძლიერეს. მისივე თქმით, საზღვრის დამცველებმა პოზიციებზე „ისკანდერები“ განალაგეს.
ამის შესახებ ლუკაშენკომ ბელარუსის დამოუკიდებლობის დღისადმი მიძღვნილ საზეიმო საღამოზე გამოსვლისას განაცხადა.
მისი თქმით, სრულ მზადყოფნაშია მოყვანილი საზღვარზე მყოფი როგორც ბელარუსული, ასევე რუსული სამხედრო-საჰაერო და საჰაერო თავდაცვის ძალები. ლუკაშენკოს თქმით, „ისკანდერის“ სარაკეტო სისტემების გარდა, პოზიციებზე განლაგებულია „პოლონეზის“ მრავალჯერადი სარაკეტო სისტემები.
„მესაზღვრეები გადაყვანილნი არიან საზღვრის დაცვის გაძლიერებულ რეჟიმზე, საქმეში ასევე ჩართულნი არიან სპეცოპერაციების ძალები“, – განაცხადა მან.
ლუკაშენკომ აღნიშნა, რომ „არანაირი წითელი ხაზები არ იქნება“ და ბელარუსზე თავდასხმის შემთხვევაში, ის არ გამორიცხავს „მოცემულ სამიზნეზე ყველა სახის იარაღით დარტყმის განხორციელებას“. ამავდროულად, ლუკაშენკო მიიჩნევს, რომ ბელარუსისა და უკრაინის საზღვარზე „არანაირი შეტაკებები“ არ მოხდება.
მან ასევე თქვა, რომ უკრაინიდან ბელარუსში უპილოტო საფრენი აპარატები შეფრინდნენ, მაგრამ ისინი „გაანადგურეს“.
დაძაბულობა ბელარუსთან საზღვარზე
2024 წლის ივნისის ბოლოს, ბელარუსის სპეცრაზმის მეთაურის მოადგილემ იდეოლოგიური მუშაობის საკითხებში, ვადიმ ლუკაშევიჩმა განაცხადა, რომ უკრაინის საზღვარზე „დაძაბულობა იზრდება“ და, სავარაუდოდ, „ომში ბელარუსის ჩათრევას“ ცდილობენ. უკრაინის სახელმწიფო სასაზღვრო სამსახურმა კი, თავის მხრივ“, აღნიშნა, რომ ასეთი რიტორიკა „ბელარუსული სტილია“.
უკრაინის სახელმწიფო სასაზღვრო სამსახურმა 1 ივლისს განაცხადა, რომ უკრაინა აძლიერებს საზღვარს „ნებისმიერი ქმედების თავიდან ასაცილებლად, რომელიც შეიძლება ბელარუსის ტერიტორიიდან განხორციელდეს“. უკრაინელმა მესაზღვრეებმა მინსკის განცხადებებს „საინფორმაციო ოპერაცია“ უწოდეს და აღნიშნეს, რომ ბელარუსი, 21 ივნისიდან, თავისი სამხედრო ნაწილების საბრძოლო ეფექტურობას ამოწმებს.