ჩვენ გავაკეთებთ ყველაფერს, რომ სრულად იყოს გამოძიებული ეს ინციდენტი, – განაცხადა საქართველოს თავდაცვის მინისტრმა ირაკლი ჩიქოვანმა სამხედრო ვერტმფრენის ჩამოვარდნის შესახებ.
„ძალიან დიდი ტკივილია ის დანაკარგი, რომელიც გვაქვს თავდაცვის ძალებში და ეს ტრაგედია არის უმძიმესი. რა თქმა უნდა, ჩვენ გავაკეთებთ ყველაფერს, რომ სრულად იყოს გამოძიებული ეს ინციდენტი. თავდაცვის ძალები არის ერთი დიდი ოჯახი და ჩვენ გვერდში დავუდგებით დაღუპული ვიცე-პოლკოვნიკის ოჯახს”, – განაცხადა მინისტრმა.
სოფელ დისველთან სამხედრო ვერტმფრენი 2 ივლისს, გეგმური სამხედრო სწავლების დროს ჩამოვარდა. შედეგად ვიცე-პოლკოვნიკ კახაბერ ზურაბაშვილი დაიღუპა.
თავდაცვის სამინისტრომ გაავრცელა განცხადება, რომელშიც აღნიშნულია, რომ წინასწარი მოკვლევით, საფრენი აპარატი გაფრენამდე სრულად იყო შემოწმებული.