85 ასაკში გარდაიცვალა ქართველი მსახიობი ქეთევან კიკნაძე. ინფორმაციას მარჯანიშვილის თეატრი ავრცელებს.
„85 წლის ასაკში გარდაიცვალა ქართული თეატრისა და კინოს გამორჩენილი მსახიობი, საქართველოს სახალხო არტისტი , შოთა რუსთაველის სახელობის პრემიის ლაურეატი ქეთევან კიკნაძე. მარჯანიშვილის თეატრი მწუხარებას გამოთქვამს ქალბატონი ქეთევან კიკნაძის გარდაცვალების გამო და უსამძიმრებს მის ოჯახსა და კოლეგებს“,-ნათქვამია მარჯანიშვილის თეატრის „ფეისბუქის“ ოფიციალურ გვერდზე გამოქვეყნებულ სამძიმრის წერილში.
ქეთევან კიკნაძემ 1959 წელს დაამთავრა თბილისის სახელმწიფო თეატრალური ინსტიტუტის სამსახიობო ფაკულტეტი. 1959 წლიდან იყო მარჯანიშვილის თეატრის მსახიობი; გადაღებულია 16-ზე მეტ მხატვრულ, სატელევიზიო ფილმსა და სერიალებში: მარიამი („შეხვედრა წარსულთან“), თინა („ტარიელ გოლუა“), ბეჩუნი პერტია („დათა თუთაშხია“), ზაზას დედა („თეთრი ბაირაღები“), მარგო („პრემიერა“), ქეთევან დედოფალი („წიგნი ფიცისა“) და სხვ. მონაწილეობდა 100-მეტ სპექტაკლში.
მიღებული აქვს ჯილდოები, პრემიები და პრიზები: 2005 – ბორჯომის საპატიო მოქალაქე; 1999 – ღირსების ორდენი ქართული თეატრალური და კინოხელოვნების განვითარებაში შეტანილი პირადი დიდი წვლილისა და ნაყოფიერი შემოქმედებითი და საზოგადოებრივი მოღვაწეობისათვის; 1991 – ჯეიმს თაუნის (აშშ) საპატიო მოქალაქე; 1987 – საქართველოს სახალხო არტისტი; 1987 – შოთა რუსთაველის სახელობის სახელმწიფო პრემია; კოტე მარჯანიშვილის სახელობის პრემია; საქართველოს დამსახურებული არტისტი.