სამშაბათს, 6 აგვისტოს, კოპენჰაგენში იმ პოლონელის სასამართლო პროცესი დაიწყო, რომელმაც, ნასვამ მდგომარეობაში ყოფნის დროს, დანიის პრემიერ-მინისტრ მეტე ფრედერიკსენის მიაყენა დარტყმა. ბრალის დამტკიცების შემთხვევაში, მას პატიმრობა და დეპორტაცია ემუქრება. ეჭვმიტანილი, რომლის ვინაობის მედიაში დასახელება დანიის ხელისუფლებამ აკრძალა, ინციდენტის ადგილზე მაშინვე დააკავეს. სამართალდამცავების განცხადებით, ეს მოხდა 7 ივნისს კოპენჰაგენის ერთ-ერთ მოედანზე განხორციელებული თავდასხმის შემდეგ, რის შედეგადაც პრემიერ-მინისტრმა კისრის დაზიანება მიიღო. 39 წლის მამაკაცი თავის დანაშაულს უარყოფს და აცხადებს, რომ არ ახსოვს, რა მოხდა. როგორც პრემიერის ოფისი იტყობინება, 46 წლის ფრედერიკსენმა სამედიცინო შემოწმება გაიარა, რის შემდეგაც მას „მარჯვენა მხრის სისხლჩაქცევა და კისრის მცირე დაზიანება“ დაუდგინდა.
პროკურორი ლეინ სტეფენსენი ამტკიცებს, რომ თავდამსხმელი მამაკაცი ნასვამ მდგომარეობაში იყო და პრემიერ-მინისტრთან შეტაკებამდე ცოტა ხნით ადრე, სასურსათო მაღაზიიდან ალკოჰოლი მოიპარა. სტეფენსენის განცხადებით, ეჭვმიტანილი, მაღაზიებში ქურდობისთვის, არაერთხელ დააკავეს მას შემდეგ, რაც ის ხუთი წლის წინ, დანიაში საცხოვრებლად გადავიდა. საბრალდებო დასკვნის თანახმად, ის დადანაშაულებულია საჯარო მოხელის მიმართ ძალადობაში, კერძოდ – ფრედერიკსენისთვის „მარჯვენა მხარზე მუშტის” დარტყმაში. მას ასევე წაუყენეს რამდენიმე ბრალდება უხამსი ქცევისა და თაღლითობისთვის, რომლებიც იმავე დღეს და წარსულში მომხდარ სხვა ინციდენტებს უკავშირდება.
სასამართლო პროცესი კოპენჰაგენის საოლქო სასამართლოში 9:30 საათზე (0730 GMT) დაიწყო და ორი დღე გაგრძელდება.
„დამწუხრებული და შოკირებული“
პრემიერ-მინისტრი მეგობართან შესახვედრად და ყავის დასალევად მიდიოდა, როცა ეჭვმიტანილი მიუახლოვდა. თვითმხილველების თქმით, ფრედრიკსენს თან დაცვის ჯგუფი ახლდა, თუმცა, დაკავებამდე ბრალდებულმა მასთან მიახლოება მაინც მოახერხა. 2019 წელს, 41 წლის ასაკში პრემიერად არჩევის შემდეგ, ფრედერიკსენი დანიის მთავრობის ყველაზე ახალგაზრდა ხელმძღვანელი გახდა. 2022 წელს მან არჩევნებში ხელახალი გაიმარჯვა. ინციდენტის შემდეგ ფრედერიკსენმა აღნიშნა, რომ ის „დამწუხრებული და შოკირებული“ იყო და ევროპარლამენტის არჩევნების ბოლო დღეს, საარჩევნო კამპანიაში მონაწილეობა არ მიუღია.
თავდასხმიდან ერთი კვირის შემდეგ, ფრედერიკსენმა განაცხადა, რომ მან პროფესიონალური დახმარების გაწევა ითხოვა. „ჩემს ცხოვრებაში პირველად ვითხოვე დახმარება“, – განუცხადა მან დანიურ TV2-ს კუნძულ ბორნჰოლმზე გამართულ ფესტივალზე. დანიური მედიის ცნობით, არც პროკურატურა და არც დაცვის მხარე ფრედერიკსენს სასამართლო პროცესზე მოწმის სახით არ გამოიძახებს. „მტკიცებულებების სიმყარიდან გამომდინარე, მიგვაჩნია, რომ მოწმის სახით მისი გამოძახება საჭირო არ არის“, – განაცხადა სპეციალურმა პროკურორმა, ანდერს ლარსონმა ბრალდების წარდგენის შემდეგ, იტყობინება საინფორმაციო სააგენტო Ritzau.
„საქმე ადეკვატურად წარმართვა სხვა მტკიცებულებებსა და ინფორმაციებზე დაყრდნობითაც შეიძლება. ასე რომ, დაზარელებულის მიერ ამბის მოყოლა საჭირო აღარ არის“, – დასძინა მან. დანიის პრემიერზე თავდასხმა მკაცრად დაგმეს წამყვანმა ევროპელმა პოლიტიკოსებმა, მათ შორის ევროკავშირის კომისიის ხელმძღვანელმა ურსულა ფონ დერ ლაიენმა. მან მომხდარს უწოდა „ამაზრზენი აქტი, რომელიც ეწინააღმდეგება ყველაფერს, რისიც გვჯერა და რისთვისაც ვიბრძვით ევროპაში“. ევროპარლამენტის არჩევნების წინ ფრედრიკსენზე თავდასხმას წინ უძღვოდა ევროპელ პოლიტიკოსებზე თავდასხმების სერია. კერძოდ, 15 მაისს სლოვაკეთის პრემიერ-მინისტრ რობერტ ფიცოს ახლო მანძილიდან ოთხჯერ ესროლეს, როდესაც მთავრობის სხდომის შემდეგ ის მხარდამჭერებს ესალმებოდა.
გარდა ამისა, რამდენიმე პოლიტიკოსს გერმანიაში სამსახურში ან საარჩევნო კამპანიის დროს დაესხნენ თავს.