გაეროს უშიშროების საბჭოს წევრებმა საქართველოს დამოუკიდებლობის, სუვერენიტეტისა და ტერიტორიული მთლიანობის მიმართ ერთგულება კიდევ ერთხელ დაადასტურეს. საქართველოს საკითხზე შეხვედრა დახურულ კარს მიღმა ჩატარდა.
შეხვედრის შემდეგ უშიშროების საბჭოს წევრების: საფრანგეთის, იაპონიის, სლოვენიის, დიდი ბრიტანეთის, შეერთებული შტატების, მალტის, ასევე უშიშროების საბჭოს მომავალი წევრების, საბერძნეთისა და დანიის სახელით განცხადება მალტის მუდმივი წარმომადგენლის მოადგილემ ფრანჩესკა გატიმ გააკეთა.
მისი თქმით, საბჭოს წევრები გმობენ საქართველოს მოქალაქეების: დავით ბაშარულის, გიგა ოთხოზორიას, არჩილ ტატუნაშვილის, თამაზ გინტურისა და ვიტალი კარბაიას მკვლელობებს.
„ჩვენ მტკიცედ ვადასტურებთ საქართველოს დამოუკიდებლობას, სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში. ვგმობთ რუსეთის ფედერაციის მიერ საქართველოს ტერიტორიული მთლიანობის განგრძობით უხეშ დარღვევას. ჩვენ ასევე ვგმობთ რუსეთის უხეშ შეჭრას და უკანონო სამხედრო ყოფნას აფხაზეთსა და ცხინვალის, სამხრეთ ოსეთის რეგიონებში, რომელიც ეწინააღმდეგება გაერო-ს წესდებას. ეს რეგიონები საქართველოს განუყოფელი ნაწილია“, – განაცხადა ფრანჩესკა გატიმ.