უკრაინის პრეზიდენტმა, ვლადიმირ ზელენსკიმ განაცხადა, რომ უკრაინის ჯარების კურსკის ოლქში შეჭრის მიზანი რუსეთთან საზღვარზე ბუფერული ზონის შექმნაა. როგორც „ასოშეტეიდ პრესი“ აღნიშნავს, ამით უკრაინის ლიდერმა პირველად განმარტა შეტევის მიზანი, რომელიც უკრაინის ჯარმა 6 აგვისტოს დაიწყო. ამ დრომდე ზელენსკი ამტკიცებდა, რომ ოპერაციის მიზანი სასაზღვრო რეგიონის მოსახლეობის მუდმივი დაბომბვებისგან დაცვა იყო.
ზელენსკის თქმით, ახლა უკრაინის ჯარების მთავარი ამოცანა რუსეთის პოტენციალის რაც შეიძლება მეტად განადგურებაა, რომელსაც მოსკოვი უკრაინაზე თავდასხმისთვის იყენებს. „ამ ამოცანას ემსახურება ბუფერული ზონის შექმნა აგრესორის ტერიტორიაზე, რისთვისაც კურსკის ოლქში ჩვენი ოპერაცია ტარდება“, – ციტირებს უკრაინის პრეზიდენტის ნათქვამს „უკრაინსკა პრავდა“.
როგორც „ასოშეიტედ პრესი“ იუწყება, ამ დრომდე, რუსეთის ტერიტორიაზე უკრაინის ჯარების შეჭრაზე საუბრისას, ვლადიმირ ზელენსკი ამბობდა, რომ ამ ოპერაციის მიზანი სუმის ოლქის სასაზღვრო სოფლების დაცვა იყო, რომლებიც რუსეთის მიერ მუდმივად იბომბება.
კვირა საღამოს ზელენსკიმ ასევე ისაუბრა უკრაინელი ჯარისკაცების მძიმე მდგომარეობაზე ქვეყნის აღმოსავლეთში, სადაც მათ, პოკროვსკისა და ტორეცკის მახლობლად, დღეში ათობით რუსული თავდასხმის მოგერიება უწევთ. მან ასევე მოუწოდა მოკავშირეებს, დააჩქარონ საჭირო იარაღისა და საბრძოლო მასალის მიწოდება. „მე განსაკუთრებით მივმართავ შეერთებულ შტატებს, დიდ ბრიტანეთს და საფრანგეთს“, – განაცხადა მან.
საინფორმაციო სააგენტო „უნიანი“ იხსენებს, რომ ფრონტზე ყველაზე რთული ბრძოლები პოკროვსკის მახლობლად მიმდინარეობს და იქ რუსული ჯარები წინ მიიწევენ. ამასთან დაკავშირებით, უკრაინის ვიცე-პრემიერმა, ირინა ვერეშჩუკმა ფრონტის ხაზთან მცხოვრებ ადამიანებს ევაკუაციისკენ კიდევ ერთხელ მოუწოდა.