“პირდაპირ ჩანს, რომ არსებობს სქემა, როდესაც ხდება ე.წ. არასამთავრობო ორგანიზაციების და არასამთავრობო ორგანიზაციებს ამოფარებული პოლიტიკოსების მხრიდან პირდაპირ თანხების შემოტანა საზღვარგარეთიდან ქართულ პოლიტიკაში”, – ამის შესახებ მმართველი გუნდის წევრი, არჩილ თალაკვაძე აცხადებს.
დეპუტატის თქმით, ეს კანონის და საარჩევნო პრინციპების ძალიან უხეში დარღვევაა.
“როდესაც სამოქალაქო საზოგადოებები და არასამთავრობო ორგანიზაციები დგებიან პოლიტიკურ სცენაზე, აკეთებენ ოპოზიციური პარტიების საქმეს და მოქალაქეებს ეუბნებიან, რომ ისინი პარტიები კი არა, არიან სამოქალაქო საზოგადოება – ეს აზიანებს მთლიანად სამოქალაქო საზოგადოების იდეას. სწორედ ამისთვის იყო საჭირო გამჭვირვალობის მექანიზმი, ისეთი როგორიც აქვს ევროკავშირის 12 ქვეყანას, ისეთი როგორიც აქვს ამერიკის შეერთებულ შტატებს, ისრაელს, ავსტრალიას, კანადას და არა ერთ სხვა დემოკრატიას მსოფლიოში. საქართველოს და ჩვენს საზოგადოებასაც ზუსტად ეს ინფორმაცია უნდა ჰქონოდათ.
დღეს უკვე, რადგან კანონი არსებობს, რადგან ეს მექანიზმი დაინერგა, უკვე არის იმის შესაძლებლობა, რომ მოქალაქეებმა გაიგონ, თუ რა მექანიზმებითა და გვერდის ავლით ხდება ამ ფულის შემოტანა ქართულ პოლიტიკაში”, – განმარტავს თალაკვაძე.