ლატვიის ყოფილმა პრემიერ-მინისტრმა, კრიშიანის კარინშმა („Jaunā Vienotība“/„ახალი ერთობა“) გადაწყვიტა, სეიმის დეპუტატობაზეც უარი თქვას და პარლამენტში მუშაობა აღარ გააგრძელოს. ეს ინფორმაცია ფრაქციის ხელმძღვანელმა, ედმუნდს იურევიჩსმა ლატვიის ტელევიზიას 29 აგვისტოს ოფიციალურად დაუდასტურა.
კრიშიანის კარინში პოლიტიკაში 20 წელზე მეტი ხნის წინ პარტია „Jaunais Laiks“-თან („ახალი დრო“) ერთად მოვიდა, მუშაობდა სეიმსა და ევროპარლამენტში, ასევე დიდი ხნის განმავლობაში იყო ქვეყნის პრემიერ-მინისტრი და შედარებით მცირე ხნით – საგარეო საქმეთა მინისტრი. 15 წელზე მეტი ხნის წინ, კარინშს ეკონომიკის მინისტრის პოსტი ეკავა აიგარ კალვიტისის („სახალხო პარტია“) მთავრობაში.
საგარეო საქმეთა მინისტრის თანამდებობიდან გადადგომის შემდეგ, რაც მისი პრემიერ-მინისტრობის დროს ძვირადღირებული ფრენებით სარგებლობასთან დაკავშირებულ სკანდალს უკავშირდება, მიმდინარე წლის აპრილში, კარინში სეიმში დაბრუნდა.
მანამდე ის, ოთხ წელზე მეტი ხნის განმავლობაში, მინისტრთა კაბინეტს ხელმძღვანელობდა. კარინში იყო ლატვიის ერთ-ერთი ყველაზე გამორჩეული პრემიერ-მინისტრი (ამ თანამდებობაზე ყოფნის ხანგრძლივობის თვალსაზრისით), რომლის დროსაც ქვეყანამ კოვიდპანდემია გადაიტანა.
კარინში ამ ზაფხულს ევროპარლამენტის არჩევნებში მონაწილეობდა, როგორც „ახალი ერთობის“ პარტიული სიის რიგით მეორე კანდიდატი და ამ გზით ბრიუსელში დაბრუნებას ცდილობდა, მაგრამ ის არ აირჩიეს, რადგან ძვირადღირებული ჩარტერული რეისებით სარგებლობით გამოწვეულმა სკანდალმა მისი იმიჯი საგრძნობლად შეარყია.