ევროკავშირის პროკურატურის (EPPO) ოფისი ყოფილი ევროპარლამენტარის, ვიქტორ უსპასკიჩის (ლიეტუვა) საქმეს იძიებს. მას თაღლითობას ედავებიან, რის შედეგად მიყენებული ზიანის ღირებულება ნახევარ მილიონ ევროს აღემატება. თავდაპირველად საქმეში მხოლოდ ევროდეპუტატის თანაშემწე ფიგურირებდა, ახლა კი კვალი უკვე თავად პოლიტიკოსამდე მივიდა.
ხუთშაბათს, 29 აგვისტოს, ევროკავშირის პროკურატურამ გაავრცელა განცხადება, რომლის თანახმად, ყოფილი ევროპარლამენტარი ლიეტუვადან „ოფიციალურად არის ეჭვმიტანილი სამსახურებრივი უფლებამოსილების ბოროტად გამოყენებაში, დოკუმენტების გაყალბებასა და მათ გამოყენებაში, ელექტრონული დოკუმენტაციის უკანონო შეძენაში, ფლობასა და გამოყენებაში და ძვირადღირებული უცხოური აქტივების შეძენაში“.
ევროკავშირის პროკურატურა ეჭვმიტანილის ვინაობას არ ასახელებს, მაგრამ ლიეტუვას პროკურორმა, ვიტაუტას კუკაიტისმა სააგენტო „ბი ენ ეს“-ს („BNS“) დაუდასტურა, რომ ეს პიროვნება ვიქტორ უსპასკიჩია.
ჯერ კიდევ აპრილში, სამართალდამცავმა უწყებებმა, ევროკავშირის პროკურატურის გამოძიების ფარგლებში, ლიეტუვას ლეიბორისტული პარტიის ოფისში ჩაატარეს ჩხრეკა. თავდაპირველად ეჭვი არსებობდა ევროპარლამენტარის თანაშემწის მხრიდან ფაქტობრივი მოვალეობების შეუსრულებლობაზე ან ამის იმიტაციაზე. მაშინ ვიქტორ უსპასკიჩი ევროპარლამენტში ლიეტუვას ლეიბორისტული პარტიის ერთადერთი წევრი იყო. ივნისში, ახალ არჩევნებში, მან თავისი კანდიდატურა აღარ დააყენა.
ევროკავშირის პროკურატურის ინფორმაციით, სავარაუდო ყალბმა გაქირავებამ, შესაძლოა, 500 000 ევროზე მეტი ღირებულების ფინანსური ზიანი გამოიწვია.
„გამოძიების ამ ეტაპზე ეჭვმიტანილია ორი პირი, რომელთა მიმართ მიღებულია სიფრთხილის ზომები, მათ შორის – წერილობითი ვალდებულება ქვეყნიდან გაუსვლელობის შესახებ და პირადი დოკუმენტების ჩამორთმევა“, – იუწყება EPPO. გარდა ამისა, ევროკავშირის უფლებამოსილმა პროკურორმა დააწესა დროებითი შეზღუდვები საკუთრების უფლებაზე, რათა უზრუნველყოფილი იყოს პოტენციური ზიანის ანაზღაურება.
უსპასკიჩი ლიეტუვას ლეიბორისტული პარტიის დამფუძნებელი და ყოფილი ლიდერია. ევროპარლამენტის არჩევნებსა და წლევანდელ ლიეტუვას საპრეზიდენტო არჩევნებში წარუმატებელი შედეგების შემდეგ, პარტიის ხელმძღვანელი, ანდრიუს მაზურონისი თანამდებობიდან გადადგა და უსპასკიჩმა დროებითი თავმჯდომარის პოსტი დაიკავა.