შვეიცარიის აეროპორტებისა და ავიაკომპანიებისთვის მგზავრების სახის ამოცნობის სისტემის გამოყენების უფლების მიცემა იგეგმება. მთავრობა გეგმავს, მგზავრთა მომსახურების პროცესში ბიომეტრიული მონაცემების გამოყენებას მწვანე შუქი აუნთოს.
საავიაციო კანონში შესატანი შესაბამისი ცვლილებების პროექტი განსახილველად ფედერალურმა საბჭომ უკვე წარადგინა.
მთავრობა აცხადებს, რომ ბიომეტრიული მონაცემების გამოყენება მგზავრებს საშუალებას მისცემს, უარი თქვან ქაღალდის ბილეთების ან ჩასხდომის ელექტრონული ტალონების გამოყენებაზე. სახის ამოცნობის სიტემა შეიძლება გამოყენებულ იქნას ბარგის ჩაბარების, მისი შემოწმების, ჩასხდომის საშვის მონიტორინგის ან თვითმფრინავში ასვლის დროს.
სახის ამოცნობის სისტემაზე წვდომა აეროპორტებისა და ავიაკომპანიების თანამშრომლებისთვის იქნება ნებადართული. მთავრობის განცხადებით, მგზავრებისთვის, რომლებიც მათ მიმართ სახის ამოცნობის სისტემის გამოყენებაზე უარს განაცხადებენ, ალტერნატივის სახით, ბიომეტრიული მონაცემების გარეშე მომსახურება უნდა იყოს შეთავაზებული, ანუ ის მოდელი, რომელიც ამჟამად არსებობს.
სახის ამოცნობის სისტემის დანერგვა ერთ-ერთია იმ 22 საკითხიდან, რომელთა მოწესრიგებაც შვეიცარიის მთავრობას აეროპორტების უკეთ დაცვის მიზნით სურს. საკითხების განხილვა და მათ ირგვლივ კონსულტაციები 28 ნოემბრისთვის დასრულდება.