თუ ავიღებთ ბოლო 10 წელს ან მეტს, წლევნდელ მეორე კვარტალში მიღებული უცხოური ინვესტიციების რაოდენობას, ყველზე მაღალი მაჩვენებელი ახლა ფიქსირდება, საუკეთესოა ამ თვალსაზრისით, – განაცხადა „ბიზნეს ინსაიდერ ჯორჯიას“ დამფუძნებელმა გიორგი აბაშიშვილმა „დღის ქრონიკაში“.
„როდესაც ზოგადად პირდაპირი უცხოური ინვესტიციების ხელშემწყობ ფაქტორებზე საუბრობენ, აქ ფაქტორთა ერთობლიობაა, ხომ? ეს არის შიდა საკანონმდებლო ბაზა, ინვესტორებისადმი დამოკიდებულება, საქართველოს პოზიციონირება საერთაშორისო რეიტინგებში, ჩვენი საგადასახადო პოლიტიკა, დაბეგვრის სისტემა, რომელიც არის პირდაპირ ორიენტირებული იმაზე, რომ ინვესტორმა რეინვესტირება მოახდინოს და არა მოგების პირდაპირ გატანა, ეს არის საკანონმდებლო ნაწილი, რომელიც ამას ხელს უწყობს. მაგრამ მთავარი ფაქტორი, რითაც ინვესტორები იღებენ გადაწყვეტილებას, ეს არის ქვეყანაში არსებული პოლიტიკური სტაბილურობა, გრძელვადიანი მშვიდობის უზრუნველყოფა. ვერცერთი საერთაშორისო რეიტინგი, საკნონმდებლო ცვლილება, საგადასახადო შეღავათი ინვესტორს ვერ დაამაგრებს ქვეყანაში, თუ არ ჰქონდა განცდა, რომ ამ კონკრეტულ ქვეყანაში მშვიდობა და სტაბილურობაა უზრუნველყოფილი“,- აღნიშნა გიორგი აბაშიშვილმა.
მისივე თქმით, მნიშვნელოვანია, რომ ინვესტორები საქართველოს თვლიან სანდო ქვეყნად, როგორც სტაბილურობის, მშვიდობისკენ მიდრეკილების კუთხით და ხედავენ, რომ ამ ქვეყანას აქვს განვითარებაზე ორიენტირი.
მან ასევე ისაუბრა იმ დარგებზე, რომლებშიც ინვესტიციების ყველაზე დიდი რაოდენობა იდება.
„პირველ რიგში, გამოვარჩევდი საქართველოს საფინანსო სექტორს, რომელმაც გაუძლო ყველა ტიპის გამოწვევას, ყველა ვითარებაში. ეს არის საქართველოს სავიზიტო ბარათი და სექტორი, რომელსაც განსაკუთრებულად უნდა გავუფრთხილდეთ. ის, რომ ჩვენი საფინანსო სექტორი წარმატებულია, ჩანს მათ შორის ლონდონის საფონდო ბირჟაზეც“, – განაცხადა აბაშიშვილმა.