კოლექტიური ლომჯარიები, კოლექტიური გიგაურები ყოველდღიურად ცდილობენ, რომ მაქსიმალურად მიიღონ მონაწილეობა ქვეყნისთვის ზიანის მიყენებაში, – განაცხადა ფრაქცია „ქართული ოცნების“ თავმჯდომარის მოადგილემ, ირაკლი კირცხალიამ.
იგი „მაკკეინის ინსტიტუტის“ გლობალური დემოკრატიის პროგრამების უფროსი დირექტორის, ლორა თორნტონის ანგარიშში ასახულ ფაქტებს გამოეხმაურა, რომლის თანახმადაც ქართველი „ენჯეოები“ საქართველოსთვის ვიზალიბერალიზაციის შეჩერებას ითხოვენ.
„სიტყვა უსამშობლოს როდესაც ვამბობთ, ამას აქვს თავისი მიზეზები და სწორედ ეს ქმედებებია უსამშობლოების ნათელი მაგალითი და დასტური. როდესაც ვიზალიბერალიზაციის საკითხი იდგა, სწორედ მათი თამადობითა და თაოსნობით, როგორ დარბოდნენ მათი წარმომადგენლები და არა მხოლოდ მათ, კაბინეტ-კაბინეტ ევროპარლამენტსა თუ ცალკეულ ქვეყნებში და როგორ არწმუნებდნენ, რომ არცერთ შემთხვევაში ქვეყნისთვის ვიზალიბერალიზაცია არ უნდა მიეცათ, რადგან ამას მმართველი გუნდი, „ქართული ოცნება“ მიიწერსო“, – აღნიშნა კირცხალიამ.
მაკკეინის ინსტიტუტის გლობალური დემოკრატიის პროგრამების უფროსმა დირექტორმა, ლორა თორნტონმა 26 ოქტომბრის საპარლამენტო არჩევნების წინ შეფასება მოამზადა „საქართველოს მეგობრების“ მისიის საფუძველზე, რომელიც თბილისში 2-8 სექტემბერს ჩატარდა. ინფორმაციას ამის შესახებ მაკკეინის ინსტიტუტი ავრცელებს.