მმართველი პარტიის საპატიო თავმჯდომარის სამშვიდობო გზავნილების შემდეგ რადიკალურ ოპოზიციაში დიდი პანიკაა, – განაცხადა ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა, ირაკლი ჩიხლაძემ.
„ახლა ყველას ტრენინგს უტარებენ, ვინც მათი პოლიტიკის მხარდამჭერია მესამე სექტორში, ახალგაზრდულ ორგანიზაციასა თუ მედიაში – ყველას, ვისაც შავი ფულით აფინანსებენ მიუთითებენ, რომ ახლა აფხაზები და ოსები მტრად მოიხსენიონ.
რა ჰქვია ამას? მოდით, სახელი თავად დაარქვით. ჩემთვის ეს არის პირდაპირი ნაბიჯები ტერიტორიული მთლიანობის მშვიდობიანად აღდგენისა და დეოკუპაციის წინააღმდეგ.
უდიდესი შეთქმულება ერთიანი, ძლიერი საქართველოს წინააღმდეგ და შიში იმისა, რომ პოლიტიკოსი, რომელმაც ჯერ ქართველი ხალხი იხსნა „ნაცმოძრაობის“ ტყვეობიდან და ახლა აქვს რეალური ამბიცია და რესურსი მშვიდობის სახელით ხელი გაუწოდოს ჩვენს აფხაზ და ოს ძმებს, ამ დაპირების განხორციელებასაც რეალურად შეძლებს.
თუ შენი ქვეყნის მტერი არ ხარ, რატომ არ უნდა გამოუცხადო მხარდაჭერა იდეას, რომელიც ივანიშვილმა საკუთარ თავზე აიღო და ჩვენს ოს და-ძმებს ურთიერთ შენდობისკენ, დაშვებული შეცდომების აღიარებისკენ, ბოდიშისკენ, შერიგებისკენ, თანაცხოვრებისკენ და ერთობისკენ მოუწოდა?!
გასულ კვირასაც გითხარით და დღესაც განვმეორდები – ჩვენ უნდა გადავდგათ ნაბიჯი დიდი შერიგებისკენ, უნდა გავაგრძელოთ პრაგმატული პოლიტიკა, ვისწავლოთ დაშვებული შეცდომების აღიარება და სხვასაც მივცეთ ამის შანსი – სწორედ ეს დააზიანებს ყველაზე მეტად ოკუპანტს.
ჩვენ ყველაფერი უნდა გავაკეთოთ იმისთვის, რომ გმირების მიერ გაღებული მსხვერპლი არ იყოს ამაო და აღსრულდეს მიზანი, რომელსაც სიცოცხლე შესწირეს.
რადიკალები დეოკუპაციის წინააღმდეგ – შორენა ხვიჩია ბოლო წლების ყველაზე მნიშვნელოვანი თემით“, – განაცხადა გადაცემის წამყვანმა სპეცრეპორტაჟის წარდგენისას.