გიორგი გახარიამ პარტია „საქართველოსთვის“ სახელით ხელი მოაწერა პრეზიდენტის „ქართულ ქარტიას“, რომელსაც რამდენიმე დღის წინ გადაცემაში „რეაქცია“ აქტიურად აკრიტიკებდა.
გახარია ამტკიცებდა, რომ მისთვის პრეზიდენტის მიერ შეთავაზებული ქარტია მიუღებელი იყო და „ნაციონალურ მოძრაობასთან“ ერთ მთავრობაში არასდროს იქნებოდა.
„მიუღებელი იყო მაგალითად ის, რომ დროებითი უნდა ყოფილიყო [მთავრობა] და რიგგარეშე არჩევნები უნდა დანიშნულიყო. ამის ლოგიკას ხედავთ? შეგიძლიათ ამიხსნათ? როდესაც ამდენი ვიშრომეთ, „ქართული ოცნება“ დავამარცხეთ და ერთ წელიწადში მას რევანშის შესაძლებლობას ვაძლევთ? ამის უკან ახლა რაიმე გონივრულობა არის? ჩემთვის ეს [ქარტია] მიუღებელია“, – ამბობდა გახარია, რაზეც წამყვანმა უპასუხა, რომ აუცილებლად მოუწევს ქარტიაზე ხელის მოწერა.
„აგერ ვნახოთ! არაფერიც არ მომიწევს. კატეგორიულად მიუღებელია „ნაციონალურ მოძრაობასთან“ ერთ მთავრობაში ყოფნა. შეუძლებელი და დაუშვებელია. არასოდეს ეს არ მოხდება. ჩვენი პარტია არასოდეს „ნაციონალურ მოძრაობასთან“ ერთად ერთ მთავრობაში არ იქნება. წერტილს ვსვამ აქ“, – ამბობდა გიორგი გახარია.
თუმცა დღეს დილით გახარიამ ქარტიის დოკუმენტს პრეზიდენტის სასახლეში მოაწერა ხელი.