მექსიკაში ჯარისკაცებმა ცეცხლი გაუხსნეს მანქანას, რომელსაც 33 მიგრანტი გადაჰყავდა.
BBC-ს ინფორმაციით, შედეგად 6 ადამიანი დაიღუპა, 10 კი დაშავდა. ინციდენტი მექსიკის სამხრეთით, გვატემალასთან საზღვრის მახლობლად მოხდა.
მექსიკის თავდაცვის სამინისტროში განმარტავენ, რომ პატრულირებისას ჯარისკაცებმა შეამჩნიეს პიკაპი, რომელიც მაღალი სიჩქარით მოძრაობდა და მძღოლი გაჩერების შესახებ მათ მოთხოვნას არ ემორჩილებოდა.
ამასთან, ჯარისკაცები ამბობენ, რომ აფეთქებების ხმა გაიგეს, რის შემდეგაც ორმა სამხედრომ ცეცხლი გახსნა. განცხადებაში აღნიშნულია, რომ ისინი მოვალეობების შესრულებას ჩამოაშორეს, სანამ მომხდარზე გამოძიება მიმდინარეობს.
უწყებაში აცხადებენ, რომ ავტომობილში იმყოფებოდნენ მიგრანტები ეგვიპტიდან, ნეპალიდან, კუბიდან, ინდოეთიდან და პაკისტანიდან.
Reuters-ი პოლიციის ანგარიშზე დაყრდნობით წერს, რომ ჯარისკაცები პიკაპს მაშინ აედევნენ, როდესაც ის საგუშაგოზე შემოწმებისთვის არ გაჩერდა და სროლით მანქანის გაჩერებას ცდილობდნენ.