ქართველ ხალხს სამი წელია სისხლი გაუშრეს, როცა უარს ეუბნებოდნენ კანდიდატის სტატუსზე, როცა უარს ეუბნებიან ახლაც მოლაპარაკებების გახსნაზე. Deep State-ს ღირსეული პასუხი გავეცით იმ უსამართლობაზე, რასაც ვხედავთ მათი მხრიდან, – ამის შესახებ საქართველოს პრემიერ-მინისტრმა, ირაკლი კობახიძემ მთავრობის ადმინისტრაციაში გამართულ პრესკონფერენციაზე განაცხადა.
კითხვაზე, ვახტანგ გომელაურის ვიცე-პრემიერად დანიშვნა იყო თუ არა პასუხი ამერიკის შეერთებულ შტატებისთვის, ირაკლი კობახიძემ აღნიშნა, რომ ეს იყო პასუხი Deep State-ისთვის, რომელიც საქარტველოს მიმართ უკვე ოთხი წელია უსამართლოდ მოქმედებს.
„პრობლემებს ხელოვნურად გვიქმნიან, ქართველ ხალხს უქმნიან ხელოვნურად პრობლემებს საკუთარი უსამართლობით. თქვენ გახსოვთ, რა ხდებოდა წინა საპარლამენტო არჩევნების შემდეგ, როდესაც რადიკალური ოპოზიციის საბოტაჟი გამოგვიცხადეს კრიზისად. ეს ხომ Deep State-მა გააკეთა თავის დროზე. რა თქმა უნდა, ამაზე პასუხიც არის ჩვენი ნაბიჯები, მერე, როდესაც არ მოგვენიჭა კანდიდატის სტატუსი, მანამდე გახსოვთ, რა ხდებოდა მელიას დაკავებასთან დაკავშირებით, იქაც Deep State მოქმედებდა. სამი წელი სისხლი გაუშრეს ქართველ ხალხს, როცა უარს ეუბნებოდნენ კანდიდატის სტატუსზე, როცა უარს ეუბნებიან ახლაც მოლაპარაკებების გახსნაზე. Deep State-ს გავეცით ჩვენ ღირსეული პასუხი იმ უსამართლობაზე, რასაც ვხედავთ ჩვენ მათი მხრიდან.
თუ პრეზიდენტი ტრამპი დაამარცხებს Deep State-ს ამ შემთხვევაში სანქციებიც მოიხსნება, დაველოდოთ როგორ განვითარდება პროცესები“, – განაცხადა ირაკლი კობახიძემ.