არ შეიძლება გამოგვრჩეს აშშ-ის და ევროკავშირის ურთიერთობა დღევანდელ დღეს, რომელიც, მსუბუქად რომ შევაფასოთ, არც თუ ისე სახარბიელოა, – ამის შესახებ ფრაქცია „ქართული ოცნების“ თავმჯდომარის მოადგილემ, ლევან მაჭავარიანმა, პარლამენტის პლენარულ სხდომაზე სიტყვით გამოსვლისას განაცხადა.
მან მაგალითად მოიყვანა აშშ-ის პრეზიდენტის დონალდ ტრამპის და მთავრობის ეფექტიანობის დეპარტამენტის ხელმძღვანელის ილონ მასკის განცხადებები, რომლებიც ევროკავშირის უსამართლოდ მოქცევაზე და გაერთიანების წევრი ქვეყნების მიერ საკუთარი სუვერენიტეტის განმტკიცების აუცილებლობაზე საუბრობენ. ასევე, გაიხსენა ვიცე-პრეზიდენტს ჯეი დი ვენსის გამოსვლა მიუნხენის უსაფრთხოების კონფერენციაზე.
მაჭავარიანის თქმით, იმედია, რომ „დიფ სთეითთან“ ტრამპის ბრძოლის ტენდენცია გადავა ევროპაზეც და საბოლოო ჯამში, ევროკავშირი თავის ღირებულებებს დაუბრუნდება.
“ბატონი ტრამპი აცხადებს, რომ ევროკავშირი იქცევა ამორალურად და უსამართლოდ, მასკი აცხადებს, რომ ჭარბი გავლენებია ბრიუსელის დემოკრატების ხელში, რომელსაც თავის მხრივ, მფარველობს ჯორჯ სოროსი და მოუწოდებს ევროკავშირის წევრ ქვეყნებს, გათავისუფლდნენ ამ გავლენებისგან და წინა პლანზე წამოაყენონ თავიანთი ქვეყნის სუვერენიტეტი. ამ ყველაფრის შეჯამება იყო, როდესაც ვენსი გამოვიდა მიუნხენის კონფერენციაზე სიტყვით, სადაც მან პირდაპირ ფაქტებით და მტკიცებულებებით ჩაუტარა დემოკრატიის ლექციები ევრობიუროკრატებს და აღნიშნა, რომ დემოკრატიული უკუსვლაა სერიოზული ევროპაში და ევროპა სცილდება იმ ღირებულებებს, რაზეც ევროპა დგას და რატომაც მივისწრაფვით ჩვენ ევროკავშირისაკენ. იქ საუბარი იყო ძალიან სამწუხარო ფაქტზე, რომელიც დაფიქსირდა რუმინეთში, როდესაც სასამართლოს გააუქმებინეს არჩევნების შედეგები, იქიდან გამომდინარე, რომ ბრიუსელს არ აწყობდა კანდიდატი,რომელმაც პირველ ტურში გაიმარჯვა და რა თქმა უნდა, ეს არის სერიოზული დემოკრატიული უკუსვლა.
ჩვენ, რა თქმა უნდა, ვისურვებდით და ძალიან დიდ იმედს ვიტოვებთ, რომ როგორც დონალდ ტრამპმა დაიწყო ღია ბრძოლა „დიფ სთეითთან“, ეს ტენდენცია გადავა ევროპაზეც და ევროპაც გათავისუფლდება ამ ჭარბი გავლენებისგან და საბოლოო ჯამში, ევროკავშირი დაუბრუნდება იმ ღირებულებებს, რომლის გამოც ასეთ დიდ პატივს ვცემთ.’ – განაცხადა ლევან მაჭავარიანმა.