არავის სჯეროდა, როცა გლობალურ ომის პარტიაზე ვსაუბრობდით. ახლა კი დონალდ ტრამპი ამბობს, რომ „დიფ სთეითი“, რომელსაც ღრმა ფესვები აქვს გადგმული აშშ-სა და ევროპაში, უნდა დამარცხდეს, – ამის შესახებ დედაქალაქის მერმა, კახა კალაძემ მედიასთან ევროპული სამეზობლო საბჭოს (ENC) მრჩევლის, ტერე ჰელანდის განცხადებების შეფასებისას ისაუბრა.
კახა კალაძის თქმით, ხელისუფლება ყოველთვის დაიცავს ქვეყნის სუვერენიტეტს და არავის მისცემს შესაძლებლობას, საქართველო ბრძოლის ველად გამოიყენოს.
„ვიდრე „ქართული ოცნება“ ხელისუფლებაშია, მინდა, ჩვენი ქვეყნის თითოეულმა მოქალაქემ იცოდეს ერთი რამ – ყოველთვის გამოვდივართ ქვეყნის ინტერესებიდან გამომდინარე, ჩვენ ყოველთვის დავიცავთ ჩვენს სამშობლოს, დავიცავთ ქვეყნის დამოუკიდებლობას, კიდევ უფრო განვამტკიცებთ ქვეყნის სუვერენიტეტს. ეს არის ის ყველაფერი, რისთვისაც ჩვენმა წინა თაობებმა იბრძოლეს, სისხლი დაღვარეს, რათა ქვეყანა დამოუკიდებელი ყოფილიყო და არა კონკრეტულ ადამიანზე ან თუნდაც ევროპულ სახელმწიფოებზე დამოკიდებული. ამ დამოუკიდებლობას გაფრთხილება, განმტკიცება, გაძლიერება, ქვეყნის ეკონომიკური განვითარება სჭირდება. არავის მიეცემა შესაძლებლობა, საქართველო გამოყენებული იყოს ვინმეს ინტერესების გასატარებლად ან ბრძოლის ველად. ხედავთ, უკრაინაში რა ხდება, რა პროცესები მიდის და როგორ დასრულდება ეს ყველაფერი, ცოტა მოგვიანებით ამასაც შევხედავთ. ბევრჯერ მითქვამს და გავიმეორებ, მტერს არ ვუსურვებ იმას, რაც უკრაინაში ხდება. შესაბამისად, ჩვენ მშვიდობის შენარჩუნება, ეკონომიკური გაძლიერება და იმ პოლიტიკის გაგრძელება გვჭირდება, რომელიც „ქართულმა ოცნებამ“ აირჩია“, – აღნიშნა თბილისის მერმა.
ამასთან, კახა კალაძემ კომენტარი გააკეთა ტერე ჰელანდის იმ განცხადებაზეც, რომელშიც საუბრობს, რომ აშშ აღარ არის ევროპის სანდო პარტნიორი. დედაქალაქის მერის თქმით, ევროპელი ლიდერები სხვა ქვეყნის შიდა საქმეებში ერევიან. რასაც აშშ-ის პრეზიდენტიც კარგად ხედავს და ამიტომაც საუბრობს „დიფ სთეითის“ დამარცხებაზე.
„აშშ-ის პრეზიდენტი დონალდ ტრამპი პირდაპირ საუბრობს იმ უმსგავსობებზე, რაც ევროპაში ხდება. რა თქმა უნდა, ამერიკისთვის მიუღებელია, როდესაც ევროპული ქვეყნის ლიდერები პირდაპირ ერევიან უცხო ქვეყნის არჩევნებში. რუმინეთში არჩევნები საერთოდ გააუქმეს იმის გამო, რომ შედეგები არ მოეწონათ. საქართველოში ჩატარდა არჩევნები, ქვეყნის მოსახლეობის უმრავლესობამ მხარი დაუჭირა მშვიდობას, განვითარებას. გაიმარჯვა „ქართულმა ოცნებამ“, რომელიც ამ პოლიტიკას ახორციელებს და სწორედ ეს აღმოჩნდა მათთვის მიუღებელი. ნახეთ, რა ტიპის განცხადებებს აკეთებენ, სამარცხვინოები არიან. როდესაც ტრამპი მათი მხრიდან ამ ტიპის ქმედებებს ხედავს, შესაბამის განცხადებებს აკეთებს. რა თქმა უნდა, ჩვენ ვადევნებთ თვალყურს, რომ „დიფ სთეითი“ დამარცხდეს. ყველა ხედავდა საქართველოსთან დაკავშირებით რა განცხადებები, შანტაჟი, სანქციებით მუქარა ხდებოდა. დღეს, სხვა მსოფლიოა, სხვანაირად მიდის პროცესები და კიდევ უფრო ცხადი გახდება საზოგადოებისთვის ის, რაზეც ჩვენ რამდენიმე წლის და თვის წინ ვსაუბრობდით. ჩვენი ხომ არავის სჯეროდა, როცა გლობალურ ომის პარტიას ვახსენებდით. ახლა კი დონალდ ტრამპი ამბობს, რომ „დიფ სთეითი“, რომელსაც ღრმა ფესვები აქვს გადგმული აშშ-სა და ევროპაში, უნდა დამარცხდეს“, – განაცხადა კახა კალაძემ.