პირველ რიგში, მინდა ვისარგებლო თქვენი ეთერით და დიდი მადლობა გადავუხადო ჩვენი გუნდის წევრებს – ნიკოლოზ სამხარაძეს, ლევან მახაშვილს, მაია ბითაძეს ეუთოს საპარლამენტო ასამბლეის ფორმატში საქართველოს, ჩვენი სახელმწიფოს პოზიციის ღირსეულად და ასე ვთქვათ, სწორად წარმოჩენისთვის, – განაცხადა საპარლამენტო უმრავლესობის წევრმა, კულტურის კომიტეტის თავმჯდომარემ გიორგი გაბუნიამ გადაცემა „დღის ქრონიკაში“.
მისი თქმით, ფიქრობს, რომ მათ მიერ გაცხადებული მნიშვნელოვანი მესიჯები სწორად იქნა გაგებული საერთაშორისო პარტნიორების მხრიდან.
„შედეგებიც სწორედ ამაზე მეტყველებს. რაც შეეხება ჯო უილსონს, ზოგადად, სულ მიკვირდა რატომ არის ამ ადამიანის მიერ გაკეთებული განცხადებები ასეთი საინტერესო. რეალურად, ეს ადამიანი თავად ამერიკის შეერთებული შტატებშიც კი არავის ახსოვს და არავინ იცის. წარმოიდგინეთ, 355 მილიონიან ქვეყანაში მხოლოდ 35 ათასი გამომწერი ჰყავს X-ზე. შესაბამისად, ეს ადამიანი, ასე ვთქვათ, კონკრეტული დავალებებით არის, ეს ფაქტია.
მან წაიკითხა ის ტექსტი და ჩვენ ყველა ვნახეთ ის განცხადებები, რომელიც მან გააჟღერა. ის ტექსტი, რომელიც მას დაუდეს და წაიკითხა პირდაპირ თავისი დამკვეთებისგან. შესაბამისად, მის მიერ გაკეთებული განცხადებები საქართველოს სახელმწიფოს ზიანს ვერ მიაყენებს. ჩვენ გვაქვს ჩვენი დღის წესრიგი და ვფიქრობთ, რომ ის განცხადებები, რომელიც გაკეთდა ჩვენი გუნდის მიერ, შესაბამის შედეგებს მოიტანს“, – აღნიშნა გიორგი გაბუნიამ.