საქართველო აშშ-ის მიერ გაეროში წარდგენილი რეზოლუციის `გზა მშვიდობისკენ” თანასპონსორია. რეზოლუციის მიზანი რუსეთ-უკრაინის ომის დასრულებაა. აშშ-მა რეზოლუცია 21 თებერვალს წარადგინა. ამ ეტაპზე გაეროს წვერი ქვეყნების მხრიდან მიმდინარეობს მსჯელობა რეზოლუციის მხარდაჭერასთან დაკავშირებით.
მოპოვებული ინფორმაციით, ამერიკის შეერთებული შტატების მიერ წარდგენილი რეზოლუციის მხარდაჭერის საკითხს ევროპის სხვა სახელმწიფოებიც განიხილავენ.
ასევე არსებობს ალტერნატიული რეზოლუცია, რომლის ავტორიც უკრაინაა. გამოცემა The Wall Street Journal წერს, რომ შტატები უკრაინის რეზოლუციას მხარს არ დაუჭერს.
გამოცემა წერს, რომ მისი ჟურნალისტები გაეცნენ წერილს, რომელიც აშშ-მა სხვადასხვა დედაქალაქში გაგზავნა. ამ წერილით ამერიკელი დიპლომატები ევროპელ კოლეგებს ატყობინებენ, რომ ვაშინგტონი შეეწინააღმდეგება უკრაინის რეზოლუციას და ევროპელებს მოუწოდებენ, კიევი ტექსტის გაწვევაზე დაიყოლიონ.
გამოცემის ინფორმაციით, ორი ევროპელი დიპლომატი ამბობს, რომ აშშ ბოლო დღეებამდე მუშაობდა ევროპასთან უკრაინის რეზოლუციაზე და გამოდიოდა მცირე შესწორებების შეტანის ინიციატივით.
დიპლომატები ამბობენ, რომ აშშ-მა პარასკევს უკრაინის წარმომადგენლებს რეზოლუციის უკან გაწვევა მოსთხოვა, რაზეც უკრაინამ უარი განაცხადა. პარალელურად, ბრიტანეთის და საფრანგეთის ოფიციალურმა პირებმა ვაშინგტონს სთხოვეს რეზოლუციის პროექტის შეცვლა, რაზეც დიპლომატების ინფორმაციით, აშშ-მა უარი თქვა.