აშშ-ის პრეზიდენტის, დონალდ ტრამპის განცხადებით, ოვალურ კაბინეტში უკრაინის პრეზიდენტ ვოლოდიმირ ზელენსკისთან მისი კამათი უკრაინაზე ზეწოლის სტრატეგიის ნაწილი იყო.
„ჩვენ გვჭირდებოდა უკრაინის იძულება, რათა სწორი საქმეები გაეკეთებინა. ეს არ იყო მარტივი სიტუაცია. თქვენ ნახეთ პატარა სცენა ოვალურ კაბინეტში, მაგრამ, ვფიქრობ, ახლა ისინი სწორ საქმეებს აკეთებენ და ჩვენ ვცდილობთ, მივაღწიოთ ცეცხლის შეწყვეტას, შემდეგ სამშვიდობო შეთანხმებას“, – აღნიშნა დონალდ ტრამპმა.
ამასთან, უკრაინისთვის იარაღისა და სადაზვერვო ინფორმაციის მიწოდების შეწყვეტის შესახებ კითხვაზე პასუხისას, ტრამპმა აღნიშნა, რომ ამ გადაწყვეტილებას არ მიუყენებია ზიანი უკრაინის არმიისთვის კურსკის ოლქში.
„მე თუ ვხედავ, რომ ვიღაც აკეთებს რაღაც ცუდს, რაც გამოიწვევს ბევრი ადამიანის სიკვდილს, ერთადერთი მიზეზი, რის გამოც მე ვერევი, ეს არის ჰუმანურობა. მე ვერევი ჰუმანურობის გამო, რადგან იქ ბევრი ადამიანი იღუპება“, – განაცხადა ტრამპმა.
