თავდაცვის ყოფილი მინისტრი გიორგი ყარყარაშვილი სოციალურ ქსელში პოსტს აქვეყნებს.
”წავიდა ღირსეული და გამორჩეული ადამიანი, ჩემი ახლო მეგობარი და გულშემატკივარი – ქართველი სოხუმელი, ლევან ჯანგველაძე.
ვაკვირდები მედიაში გავრცელებულ რიტორიკას, სადაც აქცენტი ლევანის ძმის წარსულზე კეთდება და ამ გზით ცდილობენ ჩრდილი მიაყენონ თავად ლევანის სახელს. ეს მცდარი შეფასებაა, რადგან თავად ლევანი იყო გამორჩეული პიროვნება
ლევანი, პირველ რიგში, განათლებული ადამიანი და პატრიოტი იყო – შესანიშნავად იცოდა ისტორია და გულით უყვარდა თავისი ქვეყანა, საქართველო, და თავისი მშობლიური კუთხე, აფხაზეთი. ის მუდამ მხარში ედგა სოხუმიდან წამოსულ დევნილებს, მათი დიდი იმედი და გულშემატკივარი იყო.
ცხოვრებამ 30 წლის განმავლობაში ყველას თავისი ბედი არგუნა – ზოგმა ევროპაში ააწყო კარიერა, ზოგმა რუსეთში, ზოგმა კი საქართველოში, მაგრამ მთავარი ეს არ არის. მთავარი ის არის, თუ როგორ გამოადგა ადამიანი თავის ქვეყანას და თავის ხალხს.
ლევანი სწორედ ის ადამიანი იყო, ვინც ბევრს ეიმედებოდა – მათ შორის, მეც.
ღრმა სამძიმარს ვუცხადებთ მის ოჯახს – დედას, ძმას, მეუღლესა, შვილებს; და ყველა მის ახლობლებს. ღმერთმა ნათელში ამყოფოს ლევანის სული!”