რუსეთის პრეზიდენტმა ვლადიმერ პუტინმა და აშშ-ის პრეზიდენტმა დონალდ ტრამპმა სატელეფონო საუბრის დროს ორ ქვეყანას შორის ჰოკეის მატჩის ორგანიზების შესახებ ისაუბრეს. ინფორმაციას რუსული მედია კრემლის პრეს-სამსახურზე დაყრდნობით ავრცელებს.
„დონალდ ტრამპმა მხარი დაუჭირა ვლადიმერ პუტინის იდეას აშშ-სა და რუსეთში ჰოკეის მატჩების ორგანიზებასთან დაკავშირებით რუს და ამერიკელ მოთამაშეებს შორის, რომლებიც ჰოკეის ეროვნულ ლიგასა და კონტინენტურ ჰოკეის ლიგაში თამაშობენ“, – ნათქვამია განცხადებაში.
ცნობისთვის, კონტინენტური ჰოკეის ლიგის კლუბებს ჰოკეის ეროვნული ლიგის კლუბებთან საგამოფენო მატჩები აქვთ ჩატარებული. 2010 წელს სანქტ-პეტერბურგის ჰოკეის კლუბმა „კაროლინა ჰარიქეინსს“ უმასპინძლა.
სანქტ-პეტერბურგის ჰოკეის კლუბის მწვრთნელმა რომან როტენბერგმა დეკემბერში განაცხადა, რომ საგამოფენო მატჩის ორგანიზების შესაძლებლობა Montreal Canadiens-ის გენერალურ მენეჯერთან კენტ ჰიუზთან განიხილა, რომელიც რუსეთში იმყოფებოდა.
მისი თქმით, მატჩის ორგანიზების ადგილებად სანქტ-პეტერბურგი, მონრეალი, დუბაი, აბუ-დაბი ან სტამბოლი განიხილებოდა. მოგვიანებით, ჰოკეის ეროვნული ლიგის წარმომადგენელმა ბილ დეილიმ განაცხადა, რომ ლიგა არ დათანხმდება მსგავს შეთავაზებას რუსულ გუნდებთან.
2022 წლის მარტში ჰოკეის ეროვნულმა ლიგამ რუსეთში არსებულ ყველა ბიზნეს-პარტნიორთან კონტაქტები შეაჩერა.