ქართველ ხალხთან, ქართულ საზოგადოებასთან და კანონთან ბრძოლაში ყველა დამარცხდება, ვისი მიზანიც იქნება, რომ როგორმე ამ ქვეყანაში კანონი და სამართლიანობა ჩამოშლილი იყოს. ეს არ გასვლია არავის და არც მომავალში გაუვა, – განაცხადა იურიდიულ საკითხთა საპარლამენტო კომიტეტის თავმჯდომარემ არჩილ გორდულაძემ გადაცემაში „დღის ქრონიკა“.
იგი ამგვარად გამოეხმაურა დროებითი საპარლამენტო საგამოძიებო კომისიის სხდომაზე მამუკა ხაზარაძის არგამოცხადებას და მის განცხადებას, რომ არც პროკურატურაში აპირებს მისვლას.
„მამუკა ხაზარაძეს ვურჩევდი ერთ მარტივ რამეს, რომ მოემზადოს იმ პასუხისმგებლობისთვის, რომელსაც მას კანონი აკისრებს და დამდგარი ფაქტია, რომ იგი არ დაემორჩილა საგამოძიებო კომისიის კანონიერ მოთხოვნას. მე არ ვარღვევ არავითარ შემთხვევაში უდანაშაულობის პრეზუმფციას, უბრალოდ, ფაქტებზე ვსაუბრობ – მას გაეგზავნა შესაბამისი მოთხოვნა საგამოძიებო კომისიის მხრიდან, რომ გამოცხადებულიყო სხდომაზე და კეთილი ენება და საზოგადოების წინაშე გაეცა ლეგიტიმურ კითხვებზე პასუხი. მაგრამ ამ ყველაფერს მან თავი აარიდა და არ გამოცხადდა. შესაბამისად, სისხლის სამართლის კოდექსში ჩვენ გვიწერია, რომ საგამოძიებო კომისიის კანონიერი მოთხოვნის შეუსრულებლობა არის სისხლის სამართლებრივი დანაშაული, ისჯება კანონით და კანონის წინაშე ყველა თანასწორია”, – განაცხადა არჩილ გორდულაძემ.
მან აღნიშნა, რომ ხაზარაძე პოლიტიკაში იმიტომ მოვიდა, რომ კანონის წინაშე პასუხისმგებლობისთვის თავი აერიდებინა.
„ზოგადად, მამუკა ხაზარაძეს და მის ძმადნაფიც ბადრი ჯაფარიძეს უკვე ჩვევაში აქვთ გადასული კანონის დარღვევა როგორც წარსულში, ისე მიმდინარე პერიოდში. არ დაგვავიწყდეს, რომ ეს ადამიანი პოლიტიკაში მხოლოდ და მხოლოდ იმიტომ შემოვიდა, რომ კანონის წინაშე არ ეგო პასუხი და ფარად აიფარა პოლიტიკაში ჩართულობა და პოლიტიკური აქტივობა. კანონი არის კანონი, მკაცრია, მაგრამ კანონია. ამ ადამიანებს მოუწევთ კანონის წინაშე პასუხისგება, როგორც აქამდე მოუწიათ, როგორც მანამდე დამარცხდნენ საქართველოს წინააღმდეგ ბრძოლაში, მათ შორის საერთაშორისო სასამართლოში, სადაც მათ მოუწიათ შესაბამისი შენატანის განხორციელება და გადახდა.
ზუსტად იგივე იქნება – ქართველ ხალხთან, ქართულ საზოგადოებასთან და კანონთან ბრძოლაში ყველა დამარცხდება, ვისი მიზანიც იქნება, რომ როგორმე ამ ქვეყანაში კანონი და სამართლიანობა ჩამოშლილი იყოს. ეს არ გასვლია არავის და არც მომავალში გაუვა. შესაბამისად, კიდევ ერთხელ მოვუწოდებთ, შევახსენებთ და გავაფრთხილებ ყველას, რომ საგამოძიებო კომისიის მოთხოვნებს თუ არ დაემორჩილებიან, მათ წინააღმდეგ შესაძლოა, დადგეს სამართლებრივი პასუხისმგებლობა.
მეც ვთქვი და ჩვენი გუნდის არაერთ წევრს აქვს გაკეთებული განცხადება, რომ მამუკა ხაზარაძე დაიწყებს აუცილებლად საუბარს, რომ პოლიტიკური დევნა ხორციელდება მის წინააღმდეგ და ზუსტად ახდა ჩვენ მიერ ნათქვამი სიტყვები, დიდი პროგნოზი ამას არ სჭირდებოდა, ამას აკეთებს ეს ადამიანი ყოველთვის.
მან დაარღვია კანონი, მის ქმედებებში დანაშაულებრივი შემადგენლობის ქმედებებიც არსებობს და შესაბამისად, პროკურატურა იმოქმედებს იმ მანდატის ფარგლებში, რომელიც მას კონსტიტუციით აქვს მინიჭებული. სხვა ადამიანებს მოვუწოდებთ, რომ დაემორჩილონ საგამოძიებო კომისიის კანონიერ მოთხოვნას და არ ჩაიგდონ თავი იმ საფრთხის წინაშე, რომელსაც ჰქვია სისხლის სამართლის პასუხისმგებლობა”, – განაცხადა არჩილ გორდულაძემ.