ჩვენ გვყავს ძირითადად ოთხი პარტია, რომლებიც საერთო „მესიჯბოქსში“ სხედან, რომლებიც არიან საერთოდ მიზნით საქართველოს წინააღმდეგ მოქმედი აგენტურული პარტიები, თუმცა ამაზე დაბეჯითებით წინასწარ მაინც არ შეიძლება საუბარი იმიტომ, რომ არ ვიცით რომლის მიმართ, რა სამართლებრივი საფუძველი იქნება, რა მტკიცებულებები შეიკვრება, რაც საშუალებას და საფუძველს მოგცემს, რომ საკონსტიტუციო სასამართლოს ამ პარტიების არაკონსტიტუციურად ცნობის სარჩელით მიმართოთ. ყველანაირი დაზღვევით რომ ვილაპარაკოთ, ჩვენ შევძლებთ ამ აგენტურული პარტიების ანტიკონსტიტუციურად გამოცხადებას, – განაცხადა „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა მამუკა მდინარაძემ პარლამენტში გამართულ ბრიფინგზე.
„ისინი გამუდმებით ცდილობენ, რომ დაამხონ ხელისუფლება, ძალადობით შეცვალონ, შეთქმულებებს აწყობენ სახელმწიფოს და კონსტიტუციური წყობილების წინააღმდეგ. ყველანაირი საფუძველი არსებობს, ყველაზე დაზღვეული სახით რომ ვთქვათ, ჩვენ გვაქვს საფუძველი მათი ანტიკონსტიტუციურად გამოცხადების, უკვე აშკარაა, უკვე კომისიის სხდომებიდანვე იკვეთება, რა დონის ანტისახელმწიფოებრივ მოქმედებებს ჩადიოდნენ წლების განმავლობაში და არა მხოლოდ 2012 წლამდე.
ჩვენ იმიტომ ვაგრძელებთ ახალი დადგენილებით მანდატს ამ კომისიისა, რომ ნათელია დღემდე გრძელდება ეს. ჩვენ სულ ლაპარაკობთ, რომ „ნაციონალური მოძრაობის“ დროს იმას აკეთებდნენ, იმას აკეთებდნენ და დღეს უფრო ემოციურადაც განახლება მოხდა ამ ინფორმაციის. მძიმე იყო მოსასმენად ის ყველაფერი, რაც ჩვენ კომისიის ფარგლებში მოვისმინეთ, მაგრამ არ უნდა დაგვავიწყდეს, რომ არანაკლებ მავნებლობას, არანაკლებ ანტიკონსტიტუციურ, ანტისახელმწიფოებრივ, ანტიეროვნულ, კოორდინირებულ ქმედებებს ჩადიოდნენ 2012 წლის შემდეგაც. ხშირად რომ ვახსენებთ ხოლმე ნახევრად ჟარგონულად, როგორ აჯანჯღარებენ დღემდე ამ ქვეყანას.
მანამ არაფერი ეშველება ამ ქვეყანას ბოლომდე და გაგვიჭირდება ჩვენ ამ ქვეყანაში მშვიდობის გარანტიის მიღება, განვითარების გარანტიების მიღება, რასაც ვახერხებთ მაგრამ დიდი წვალებით და ბრძოლით, ვიდრე ეს პარტიები პოლიტიკურ ველს არ ჩამოშორდნენ და ვიდრე გზა არ გაეხსნება ახალ, ობიექტურ, ეროვნულ ძალებს, ნიჭიერ ადამიანებს, ახალგაზრდას თუ არა ახალგაზრდას, პატრიოტ ადამიანებს, რომ ეს ნიშა დაიკავონ. დღეს დიდი ფულით, ათეულობით და ასეულობით მილიონი დოლარით დაფინანსებული აგენტები იკავებენ ოპოზიციის ნიშას, მაშინ, როდესაც საქართველოს კონსტიტუციაში მათი აკრძალვის ყველანაირი სამართლებრივი საფუძველი არის.
ზეპირად ყველამ ყველაფერი ვიცით, ყველამ ვიცით რას აკეთებენ ეს ადამიანები, ყველამ ვიცით რა ხდება თანამედროვე მსოფლიოში, როგორი გაშიშვლება და მხილება მოხდა მათი, მაგრამ ამას ამავე დროს სამართლებრივი პროცედურებისათვის, არაკონსტიტუციურად გამოცხადებისათვის სჭირდება ასევე სამართლებრივი შეფასება, რასაც ჩვენ აუცილებლად უზრუნველვყოფთ. დარწმუნებულები ვართ, რომ ობიექტურ გადაწყვეტილებას მიიღებს საკონსტიტუციო სასამართლო, როდესაც მყარი არგუმენტებით გაჯერებული სარჩელი შევა საკონსტიტუციო სასამართლოში“, – აღნიშნა მამუკა მდინარაძემ.