ევროპული სამეზობლო პოლიტიკისა და გაწევრიანების თაობაზე მოლაპარაკებების საკითხებში საქართველოს ევროკომისარი იოჰანეს ჰანი ეწვევა.
ამის შესახებ ინფორმაციას საქართველოს საგარეო საქმეთა სამინისტრო ავრცელებს. სამინისტროს ინფორმაციით, 5 მაისს გაიმართება ევროკომისრის შეხვედრები საქართველოს აღმასრულებელი და საკანონმდებლო ხელისუფლების მაღალი რანგის ოფიციალურ პირებთან, ასევე, საპარლამენტო უმცირესობის წარმომადგენლებთან.
“შეხვედრებზე მხარეების მიერ განხილული იქნება საქართველო-ევროკავშირის თანამშრომლობის დღის წესრიგში არსებული მიმდინარე პრიორიტეტები, ასოცირების დღის წესრიგით გათვალისწინებული, ქვეყანაში განხორციელებული თუ მიმდინარე რეფორმები. ევროკომისრის ვიზიტის ერთ-ერთი ძირითადი მიზანია აგრეთვე, 24 ნოემბერს ბრიუსელში დაგეგმილი ,,აღმოსალეთ პარტნიორობის’’ სამიტისთვის საქართველოს მოლოდინებზე და ინიციატივის ფარგლებში თანამშრომლობის ეფექტიანობის გაზრდის გზებზე მსჯელობა”,-ნათქვამია საქართველოს საგარეო უწყების ინფორმაციაში.
ევროკომისრის, იოჰანეს ჰანის ვიზიტის ფარგლებში, დაგეგმილია 32 მილიონი ევროს საფინანსო შეთანხმების („ტექნიკური თანამშრომლობის მექანიზმი” Technical Cooperation Facility – TCF) ხელმოწერა, რომელიც ასოცირების შეთანხმების განხორციელების პროცესის მხარდაჭერას ისახავს მიზნად.