აშშ-ის პრეზიდენტმა, დონალდ ტრამპმა ისრაელის ხელისუფლება ირანის ბირთვულ ობიექტებზე იერიშის მიტანა გააფიქრებინა. ინფორმაციას The New York Times-ი ავრცელებს.
გეგმის თანახმად, ისრაელი მაისში ამერიკული ავიაციის მხარდაჭერით ირანის ბირთვულ ობიექტებზე საჰაერო რეიდების ჩატარებას აპირებდა. ტრამპის ადმინისტრაციამ ამ გეგმას სკეპტიკურად შეხედა და ირანთან ბირთვულ თემატიკაზე მოლაპარაკებები დაიწყო.
გამოცემის ცნობით, ისრაელის სამხედრო ოპერაციის მიზანი ირანის ბირთვული პროგრამის ერთი წლით ან უფრო ხანგრძლივი დროით პარალიზება იყო. ოფიციალური თელ-ავივი ამერიკის მხარდაჭერას ითხოვდა ირანული საპასუხო დარტყმების მოგერიების საქმეში.
ამერიკელი ჩინოვნიკების ნაწილი ისრაელის გეგმას მხარს უჭერდა, თუმცა ბოლო სიტყვა ტრამპზე იყო. გასულ კვირას ისრაელის პრემიერ-მინისტრთან, ბენიამინ ნეთანიაჰუსთან შეხვედრის დროს ტრამპმა თქვა, რომ ირანზე საჰაერო დარტყმებს მხარს არ უჭერდა და ოფიციალურ თეირანთან მოლაპარაკებებს იწყებდა.
როგორც The New York Times-ი წერს, თელ-ავივი ირანულ ობიექტებზე თავდასხმას დიდი ხანია გეგმავდა. ირანზე თავდასხმის სურვილი გამძაფრდა 2024 წელს თეირანის ისრაელზე თავდასხმისა და სირიაში ბაშარ ასადის რეჟიმის დამხობის შემდეგ.
ნეთანიაჰუს განკარგულებით, ისრაელის ოფიციალურმა პირებმა ამერიკულ მხარეს გეგმა გააცნეს, რომელიც საბოლოო ჯამში მხარდაჭერილი არ იყო.