“იტალია არის ცალსახა მხარდამჭერი საქართველოს ტერიტორიული მთლიანობის და სუვერენიტეტის, – აცხადებს შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი.
სახელმწიფო მინისტრი ამით სოხუმის ე.წ მერის იტალიის ერთ-ერთ ქალაქთან განზრახვების შესახებ პროტოკოლის ხელმოწერას გამოეხმაურა.
„ჩვენ გვქონდა საუბარი, მათ შორის იტალიის საელჩოსთან. საგარეო საქმეთა სამინისტროსთან ერთად შესაბამისი ზომები არის მიღებული ამ შემთხვევაში, ისევე როგორც სხვა შემთხვევებში, როდესაც გარკვეულ კერძო კონტაქტების პოლიტიკური სარჩულით წარმოჩენა ხდება.
იტალიის ხელისუფლება, იტალია, რომელიც არის ჩვენთვის მნიშვნელოვანი ქვეყანა და გვაკავშირებს მეგობრული ურთიერთობები, არის ცალსახა მხარდამჭერი საქართველოს ტერიტორიული მთლიანობის და სუვერენიტეტის. მისი ეს პოზიცია ურყევია და აბსოლუტურად ყველა ქმედებასა და განცხადებაში ეს ხაზგამულია“, – განაცხადა ციხელაშვილმა.
რამდენიმე დღის წინ სოხუმის ე.წ მერმა იტალიის ერთ-ერთ ქალაქთან განზრახვების შესახებ პროტოკოლს ხელი მოაწერა. აღნიშნული ინფორმაცია სეპარატისტული რეჟიმის ე.წ საგარეო საქმეთა სამინისტროს ოფიციალურ ვებ-გვერდზეა განთავსებული.
არსებული ცნობის თანახმად, პროტკოლს ხელი იტალიაში, საპორტო ქალაქ ბარიში, ოკუპირებული აფხაზეთის საინვესტიციო პოტენციალის პრეზენტაციის მსვლელობისას მოეწერა.