საქართველოს ჯანდაცვის მინისტრის მოადგილემ ვალერი კვარაცხელიამ თანამდებობა დატოვა. ამის შესახებ ინფორმაცია საზოგადოებრივს კვარაცხელიამ დაუდასტურა.
„წავედი ჩემი სურვილით“, – აღნიშნა კვარაცხელიამ.
კითხვაზე, ხომ არ უკავშირდება გადადგომა ბეჟან ფარცვანიას ფაქტორს, რომელიც მისი ნათესავია და ე.წ. ფოტოგრაფების საქმეში ფიგურირებს, კვარაცხელიამ აღნიშნა, რომ გადადგომას ამასთან კავშირი არ აქვს.
„რა კავშირი უნდა ქონდეს ამას? მე ეს გადაწყვეტილება მიღებული მაქვს დაახლოებით ორი თვის წინ. უბრალოდ, პრემიერმა ახლა გადაწყვიტა, რომ გააკეთოს ეს. ამას არანაირი კავშირი არაფერთან არ აქვს. ჩემს წასვლას არანაირი კავშირი არ აქვს არც განაწყენებასთან და არც არაფერთან. ადამიანის თავში მოიხარშა აზრი, რომ დაიღალა და უნდა, სხვაგან იყოს. რა პრობლემაა“, – განაცხადა ვალერი კვარაცხელიამ.
ფოტოგრაფი გია აბდალაძემ 4 მაისს, სასამართლოში დაკითხვისას განაცხადა, რომ დაკავებისას კონტრდაზვერვის დეპარტამენტის მაღალჩინოსან და უკვე ბრალდებულ დავით დევნოზაშვილთან ერთად, მასზე ზეწოლაში კიდევ ერთი პირი მონაწილეობა, რომელიც ამჟამად “დინამოს” ბაზის უსაფრთხოებას ხელმძღვანელობს. სახელი და გვარი აბდალაძეს არ ახსოვდა, თუმცა “მოამბემ” გაარკვია, რომ ის ბეჟან ფარცვანიაა – კონტრდაზვერვის დეპარტამენტის ყოფილი თანამშრომელი. “მოამბის” წყარო ადასტურებს, რომ ფარცვანია ის პირია, ვისაც აბდალაძე ასახელებს.