სამწუხაროდ, როგორც ჩანს, დიპლომატიური მისიების ხელმძღვანელებს, რომლებიც საქართველოში ბრძანდებიან და მუშაობენ ავიწყდებათ მათი რეალური მისია და ამოცანა რა არის, – აღნიშნა „დღის ქრონიკასთან“ იურიდიულ საკითხთა საპარლამენტო კომიტეტის თავმჯდომარის პირველმა მოადგილემ თორნიკე ჭეიშვილმა, რითაც საქართველოში ევროკავშირის ელჩის, პაველ ჰერჩინსკის განცხადებას გამოეხმაურა, რომელმაც თქვა, რომ ელოდება ევროკავშირის 27 ქვეყანას, რომლებიც საქართველოს წინააღმდეგ სანქციებს დააწესებენ.
თორნიკე ჭეიშვილის თქმით, ეს განცხადება კიდევ ერთხელ ადასტურებს, რომ ელჩები ცდილობენ საქართველოს შიდა საქმეებში ჩარევას და ეს თუ არ გამოსდით გადადიან შანტაჟის ტონით საუბარზე.
„ასეთი განცხადებებით აჩენენ განწყობას და აღქმას, რომ ისინი ელჩები კი არა, გარკვეულწილად ინკვიზიტორები არიან ან მეურვეები არიან, რომლებიც ეკითხებიან თუ არ ეკითხებიან ცდილობენ მოახდინონ ქვეყნის შიდა საქმეებში ჩარევა და თუკი ეს მათ არ გამოსდით, შემდგომ უკვე იწყებენ გარკვეული მენტორული ტონით, გარკვეული შანტაჟის ტონით საუბარს, რაც მათ შორის შეიძლება გამოხატული იყოს სანქციებში. დღევანდელი განცხადება ამის კიდევ ერთი დემონსტრირება იყო, ვინაიდან თუ ჩვენ მართლა გვაინტერესებს სიმართლე და სიმართლე დღეს დევს ხელის გულზე და უკანასკნელ ორ დღეში ეს სიმართლე კიდევ ერთხელ იქნა სრული სისავსით გამომჟღავნებული, როგორც წერილში, ისე დღევანდელ განცხადებაში, რომელ სანქცირებაზე შეიძლება იყოს ლაპარაკი მაშინ, როდესაც პირიქით, არა თუ სანქციების დაწესებაზე, არამედ თუ რაღაც ლოგიკა და სამართალი არსებობს ამ სანქციების მოხსნაზე უნდა იყოს დღეს საუბარი, როგორც შეერთებულ შტატებში, ისე ევროკავშირის წევრ იმ ცალკეულ სახელმწიფოებში, რომლებმაც ეს აბსოლუტურად უგუნური აქტი ჩაიდინეს საქართველოს მიმართ“, – განაცხადა თორნიკე ჭეიშვილმა.