პირველი კრიტერიუმია, ბრძოლა, რომელშიც ერთვები, უნდა იყოს მართალი ბრძოლა, სიმართლისთვის, უკეთესისთვის ბრძოლა, – განაცხადა საქართველოს პარლამენტის დროებითი საგამოძიებო კომისიის თავმჯდომარემ, თეა წულუკიანმა, საგამოძიებო კომისიის სხდომაზე.
მისი თქმით, პოლიტიკურ ბრძოლაში ჩართვას მეტი გამოცდილება და ჭკუა სჭირდება, რათა უსინდისო პოლიტიკოსმა ვერ შეძლოს ადამიანების გამოყენება. შესაბამისად, წულუკიანის განცხადებით, ხელისუფლებისთვის ღიმილისმომგვრელია ის სტრატეგიები, რაც პოლიტიკურ ოპონენტებს აქვთ.
„ამას უნდა ცოტა მეტი ჭკუა, გამოცდილება, თავი არ უნდა გამოაყენებინო უსინდისო პოლიტიკოსს, რომელსაც მხოლოდ მავნებლობის გამოცდილება აქვს და არაფერი უკეთესი და ა.შ.. ამიტომ, მინდა ყველამ იცოდეს, რომ ღიმილისმომგვრელია ის ვითომ სტრატეგიები, რაც პოლიტიკურ ოპონენტებს აქვთ. ჩვენ, „ქართული ოცნება“, მათ მცდელობებს ამ კომისიის ფარგლებითაც და კომისიის დასკვნითაც შევებრძოლებით, რომ ასეთი რამ – „კასტილით“, ცოცხით გაუპატიურებული პატიმრის ინსტიტუტი აღარ დაბრუნდეს, პატიმრის წამება, სკამზე გამობმა და ცემა 24-საათიან რეჟიმში აღარ დაბრუნდეს, მოსამართლე, რომელიც ათავისუფლებს პატიმარს იმიტომ, რომ ევროკავშირის ელჩმა ასე გადაწყვიტა – ეს არ გვინდა, მოსამართლემ თვითონ უნდა გადაწყვიტოს, გაათავისუფლოს თუ არა და ჩვენ არასდროს დავაბრუნებთ იმ რეჟიმს, სადაც უცხოელი არის საქართველოში ბატონი. ეს არის ის, რისთვისაც ვიბრძვით კვლავ და ეს ბრძოლა ბოლომდეა მისაყვანი“, – განაცხადა თეა წულუკიანმა.