“მათი გარე უფროსები ამ არჩევნებში ფსონს აკეთებენ “ლელოზე” და გახარიაზე, ვინაიდან ისინი სისხლიან რეჟიმთან პირდაპირ კავშირში არ არიან”

ადგილობრივი თვითმმართველობის არჩევნები ოპოზიციაში ისევ მწვავე დაპირისპირების მიზეზია.

ხაზარაძე-ჯაფარიძის გუნდს, რომელიც 4 ოქტომბრის მარათონს პოლიტიკურ შესაძლებლობად განიხილავს, პარტნიორი პარტიები ღალატსა და საერთო ოპოზიციური გეგმის რღვევაში ადანაშაულებენ.

გახარიას გუნდი ემზადება, “ნაციონალური მოძრაობა” და კოალიცია “ცვლილებისთვის” კი ისევ კატეგორიულ უარზეა.

ოპოზიციაში მიმდინარე დაპირისპირება არაფერს ცვლის მმართველი გუნდისთვის, სადაც მუნიციპალური არჩევნებისა და მორიგი გამარჯვებისთვის ემზადებიან.

პარლამენტის ფრაქცია “ქართული ოცნების” თავმჯდომარის მოადგილის, ლევან მაჭავარიანის განცხადებით, “გარე ძალები ფსონს “ლელოსა” და გიორგი გახარიას პარტიაზე აკეთებენ”, რადგან ისინი პირდაპირ კავშირში არ არიან “ნაციონალური მოძრაობის” მმართველობასთან.

“სერიოზული დაპირისპირებაა კოლექტიურ “ნაციონალურ მოძრაობაში”, ოთხ რადიკალურ პარტიას შორის, ვინაიდან დანარჩენი ორი პარტია კვლავ იგივე აზრზე დგას, რომ მათ არ უნდა მიიღონ არჩევნებში მონაწილეობა, გამოაცხადონ ბოიკოტი.

როგორც ჩანს, მათი გარე უფროსები ამ არჩევნებში ფსონს აკეთებენ “ლელოზე” და გახარიაზე, ვინაიდან ისინი სისხლიან რეჟიმთან პირდაპირ კავშირში არ არიან და ფიქრობენ, რომ უფრო მეტი ხმის აღების საშუალება ექნებათ, თუ მათზე გააკეთებენ ფსონს.

ისინი იმასაც გაზომავენ, რომ “ნაციონალური მოძრაობისა” და “ახალის” არმიღების შემთხვევაში, თუ მათი ხმები ვერ გადანაწილდება ბატონი გახარიასა და ბატონი ხაზარაძის პარტიებზე, მაშინ ამ ორ პარტიასაც დაავალებენ არჩევნებში მონაწილეობას.

მნიშვნელობა არ აქვს, ორ პარტიად გაიყვანენ, კიდევ 8 პარტიად დაშლიან, თუ ერთი პარტიაში გააერთიანებენ, ჩვენ ძალიან დიდი ანგარიშით დავამარცხებთ 64-ვე მუნიციპალიტეტში”, – განაცხადა ლევან მაჭავარიანმა.