ღვინის ეროვნული სააგენტოს მხარდაჭერითა და სააგენტოს კონტრაქტორი ამერიკული მარკეტინგული კომპანიის, Colangelo & Partners-ის ორგანიზებით, სხვადასხვა სახეობის ქართული ღვინო აშშ-ში, ქალაქ ჩიკაგოში, პრესტიჟულ ღონისძიებაზე, James Beard Foundation-ზე იყო წარმოდგენილი. ინფორმაციას ამის შესახებ ღვინის ეროვნული სააგენტო ავრცელებს.
სააგენტოს ცნობით, James Beard Foundation-ის დაჯილდოების ცერემონია, რომელიც წელს ჩიკაგოს ოპერაში გაიმართა, შეფმზარეულებისა და რესტორატორების გამორჩეულ მიღწევებს, ინოვაციებს, აგრეთვე კვებისა და სასმელების ინდუსტრიაში მიღწეულ წარმატებებს ეძღვნება.
„რესტორნებისა და შეფმზარეულების ჯილდოები გადაეცემათ კულინარიულ ხელოვნებასა და, აგრეთვე, კვებისა და სასმელების ინდუსტრიაში მიღწეული წარმატებებისთვის. ყოველწლიური ღონისძიება 1986 წლიდან ტარდება და მისი მიზანია ამერიკის რესტორნების ინდუსტრიის სტანდარტების სრულყოფისა და განვითარებისთვის ხელშეწყობა.
2025 წლის James Beard Foundation-ის ცერემონიას 1500 სტუმარი, კვებისა და სასმელების ინდუსტრიისა და პრესტიჟული ამერიკული მედიაჰოლდინგების წარმომადგენელი დაესწრნენ.
მსგავსი ტიპის ღონისძიებებზე ქართული ღვინის წარდგენა-დეგუსტაციები მნიშვნელოვანია ქართული ღვინის პოპულარიზაციისა და შემდგომში მასზე მოთხოვნის ზრდისთვის ამერიკის შეერთებული შტატების ბაზარზე.
ამერიკის შეერთებული შტატები ქართული ღვინის ერთ-ერთ სტრატეგიულ საექსპორტო ბაზარს წარმოადგენს. ღვინის ეროვნული სააგენტოს მხარდაჭერით, 2013 წლიდან განხორციელებულმა მიზანმიმართულმა მარკეტინგულმა აქტივობებმა მნიშვნელოვნად შეუწყო ხელი აშშ-ში ქართული ღვინის ცნობადობის და ექსპორტის ზრდას“, – ნათქვამია ღვინის ეროვნული სააგენტოს მიერ გავრცელებულ ინფორმაციაში.