გერმანელი ღვინის მაგისტრის, კონსტანტინ ბაუმის ღვინის ონლაინ კურსებს, Cellar Class-ს ქართული ღვინის სასწავლო კურსი დაემატა.
კურსის ფარგლებში ქართული ღვინის სემინარი-წარდგენა მიუნხენში გაიმართა.
ქართული ღვინის ონლაინკურსი მოიცავს ინფორმაციას ქართული ღვინის ისტორიასა და კულტურის შესახებ, ასევე ქართული ღვინის დეგუსტაციებს. ღვინის მაგისტრმა კურსისთვის სპეციალურად შეადგინა სასწავლო წიგნი და წერითი ტესტები. კურსი შედგება რვა მოდულისგან და გათვლილია ღვინის მოყვარულებისა და მომხმარებლებისთვის. კურსის შესახებ ინფორმაციის ნახვა შესაძლებელია ბმულზე: www.cellarclass.com.
კონსტანტინ ბაუმი გერმანიაში ყველაზე ახალგაზრდა ღვინის მაგისტრი და მსოფლიოში ერთ-ერთი ყველაზე პოპულარული ღვინის Youtube არხის (www.youtube.com/@KonstantinBaumMasterofWine) მფლობელია, 185 ათასი გამომწერით და მილიონობით ნახვით. მას საკუთარ ონლაინ მაღაზიაში წარმოდგენილი აქვს პერსონალურად შერჩეული ღვინოები (baumselection.com).
ღვინის ეროვნული სააგენტოს მხარდაჭერით, კონსტანტინ ბაუმი არაერთხელ სტუმრობდა საქართველოს და ქართული ღვინის მარნებს. ასევე, ღვინის მაგისტრი ქართული ღვინის დეგუსტაციებს ატარებს ევროპის სხვადასხვა ქვეყანაში.
ევროპაში ღვინის უდიდესი იმპორტიორი ქვეყანა გერმანია ქართული ღვინის სტრატეგიული ბაზრების ჩამონათვალს 2020 წლიდან დაემატა და საექსპორტო ქვეყნების ათეულში სტაბილურად დაიმკვიდრა ადგილი.