საქართველოს საპენსიო ფონდი სტატისტიკურ მონაცემებს აქვეყნებს.
მათივე ცნობით, 30 ივნისის მდგომარეობით, საპენსიო სქემაში გაწევრიანებულ მონაწილეთა რაოდენობა მილიონ 623 ათასი ადამიანია. 2025 წლის 30 ივნისის მდგომარეობით, დაგროვებითი პენსიით ისარგებლა 22 135-მა პირმა, მათზე პენსიის სახით გაიცა 89.3 მლნ ლარი.
ამასთან, საპენსიო აქტივების ღირებულება შეადგენს 7.1 მლრდ ლარს, მათ შორის დაგენერირებულმა ამონაგებმა 1.8 მლრდ ლარს გადააჭარბა.
საპენსიო ფონდი ასევე აქვეყნებს საინვესტიციო პორტფელების 2025 წლის ივნისის თვის შედეგებს.
„ივნისი საპენსიო ფონდის პორტფელებისთვის მიმდინარე წელს ერთ-ერთი საუკეთესო თვე აღმოჩნდა, რაც დიდწილად საერთაშორისო ბაზრებზე აქციების ფასების ზრდამ განაპირობა. აღნიშნული დადებითი დინამიკა ინვესტორთა განწყობის გაუმჯობესებას უკავშირდება, რაც, თავის მხრივ, სავაჭრო მოლაპარაკებებში მიღწეული პროგრესითა და ახლო აღმოსავლეთში კონფლიქტის დეესკალაციით იყო გამოწვეული“, – აღნიშნავენ საპენსიო ფონდში.
მათივე ცნობით, გლობალურ ბაზრებზე დაფიქსირებულმა ზრდამ განსაკუთრებით პოზიტიურად იმოქმედა დინამიკურ პორტფელზე და ივნისის თვის ამონაგებმა 2.39 პროცენტი შეადგინა. ამავე პერიოდში, დაბალანსებული და კონსერვატიული პორტფელების ამონაგები, შესაბამისად, 1.78 პროცენტი და 1.27 პროცენტი იყო. პორტფელებს შორის მთავარი განსხვავება საერთაშორისო აქციების პროპორციაა: დინამიკური – 49.1 პროცენტი; დაბალანსებული – 31.0 პროცენტი; კონსერვატიული – 16.7 პროცენტი.
„აღსანიშნავია, რომ ივნისის თვის ძლიერი შედეგების ფონზე დინამიკური პორტფელი ლიდერობს. პორტფელების დაარსებიდან (2023 წლის 6 აგვისტო) დღემდე გაწლიურებულმა ამონაგებმა დინამიკური პორტფელისთვის 13.8 პროცენტი შეადგინა, იმავე პერიოდში დაბალანსებული და კონსერვატიული პორტფელების ნომინალური ამონაგები შესაბამისად 12.7 პროცენტი და 11.6 პროცენტი იყო“, – ნათქვამია საპენსიო ფონდის ინფორმაციაში.
მათივე ცნობით, საქართველოს საპენსიო ფონდის აქტივებმა ივნისის ბოლოსთვის – 7.1 მილიარდ ლარს, ხოლო დაგენერირებულმა ამონაგებმა – 1.8 მილიარდ ლარს მიაღწია.