თბილისის მერია თევდორე მღვდლის ქუჩაზე ჩამონგრეული კორპუსის მობინადრეებს დროებით სასტუმროში განათავსებს.
როგორც ადგილზე მყოფმა თბილისის მერის მოადგილე ირაკლი ბენდელიანმა განაცხადა, მუნიციპალიტეტი განაახლებს მოლაპარაკებებს მოსახლეობასთან, რათა კორპუსის ყველა მცხოვრებისგან მიიღოს სრული თანხმობა ავარიული შენობის დემონტაჟისა და ახალი საცხოვრებელი კორპუსის მშენებლობასთან დაკავშირებით.
„გამგეობას დავალებული აქვს, რომ კიდევ ერთხელ, თითოეულ ოჯახთან განახორციელონ კომუნიკაცია. პირველ ეტაპზე, უზრუნველვყოფთ, რომ თითოეული ოჯახი გავიყვანოთ სასტუმროში, დავაბინაოთ, რათა მათი უსაფრთხოება იქნას სრულად დაცული. განვაახლებთ ისევ მოლაპარაკებებს, რათა მოსახლეობის 100%-იანი თანხმობა ავიღოთ, რაც შეიძლება მალე დავიწყოთ ამ კორპუსის დემონტაჟი და ახალი საცხოვრებელი კორპუსის მშენებლობა“, – განაცხადა ირაკლი ბენდელიანმა.
ამ ეტაპზე, დიდუბის რაიონის გამგეობას დაზარალებული მოსახლეობა სასტუმრო „იბერიალსა“ და სასტუმრო „აფაში“ გადაჰყავს. ამასთან, გამგეობა აქტიურ რეჟიმში აგრძელებს სხვა სასტუმროების მოძიებასაც დაზარალებულთა დასაბინავებლად.