„აშშ-რუსეთის სამიტი, არსებითად, არაფრისმომცემი გამოდგა, მაგრამ სიმბოლურად [რუსეთის დიქტატორმა ვლადიმერ] პუტინმა გაიმარჯვა – ის ჩავიდა აშშ-ში, სადაც თბილად მიიღეს, პრეზიდენტის ცნობილი ლიმუზინით ატარეს და წითელ ხალიჩაზე მიესალმნენ“, – ასე შეაფასა „ლატვიის რადიოსთან“ ინტერვიუში ალასკაზე პუტინისა და აშშ-ის პრეზიდენტის, დონალდ ტრამპის შეხვედრა გეოპოლიტიკური კვლევების ცენტრის დირექტორმა, რიგის სტრადინშის უნივერსიტეტის ასოცირებულმა პროფესორმა, მარის ანჯანსმა.
მისი აზრით, დამარცხებულად ტრამპის მოხსენიება არ შეიძლება: „უფრო სწორად, მან არც მოიგო და არც წააგო. წინა შეხვედრისგან განსხვავებით, ამჯერად ტრამპი გულუბრყვილოდ არ გამოიყურებოდა, მიუხედავად იმისა, რომ მისი სხეულის ენა, ყველა ჟესტი უსიამოვნო იყო. ის ფაქტი, რომ პუტინმა პირველმა დაიწყო საუბარი და ტრამპმა მას ვლადიმერი უწოდა, რა თქმა უნდა, უსიამოვნოდ გამოიყურებოდა, მაგრამ არც ისე ჩანდა, რაც არსებით დათმობას შეიძლება ნიშნავდეს“.
ანჯანსის შეფასებით, ამ სამიტის კარგი ამბავი ის არის, რომ არ მომხდარა კულისებს მიღმა შეთანხმებები, აგრეთვე „უკრაინა არ გაყოფილა ან რაიმე სხვა უსიამოვნო გადაწყვეტილება არ მიღებულა“.
ანჯანსის თქმით, ტრამპმა აღიარა, რომ სამიტი შინაარსიანი იყო და ახლა მთავარი ის არის, თუ რა იქნება შემდეგში განხილული. „ვფიქრობ, უახლოეს საათებში ან დღეებში მეტი ინფორმაცია იქნება. პრესკონფერენციაზე მოვისმინეთ, რომ პუტინმა ტრამპი მოსკოვში მიიწვია. როგორც ჩანს, ტრამპი ამან, გარკვეულწილად, გააკვირვა. ახლა ისღა დაგვრჩენია, მოვლენების შემდგომ განვითარებას დაველოდოთ“, – აღნიშნა მკვლევარმა.
მისივე თქმით, ტრამპმა აღიარა, რომ პუტინთან მისი პირისპირ საუბარი აუცილებელია.
„ახლა საკითხავი ის არის, ხომ არ დაიღალა ტრამპი ამ ყველაფრისგან. ის საკმაოდ დაღლილად გამოიყურებოდა… ხომ არ ჩამოუშვებს ტრამპი ხელებს და ექნება თუ არა სურვილი, რაიმე გააკეთოს შემდეგში“, – ამბობს გეოპოლიტიკური კვლევების ცენტრის დირექტორი.
კითხვაზე, თუ რას ნიშნავს სამიტი უკრაინისა და ევროკავშირისთვის, პროფესორმა ანჯანსმა განაცხადა, რომ „სხვა ყველაფერთან ერთად, ეს ნიშნავს ლოდინს“. „სამიტები და შეხვედრები კიდევ იქნება. სამწუხაროდ, რუსეთის წინააღმდეგ. სანქციები [აშშ-ის მიერ] ჯერ არ არის დაწესებული (…) ამ ეტაპზე კვლავ არსებობს გაურკვევლობა იმის შესახებ, თუ რა იქნება მომავალში“, – აღნიშნა მკვლევარმა და დასძინა, რომ „პუტინი ცდილობს, გრძელვადიან თამაშში ითამაშოს, რათა თავისთვის რაც შეიძლება მეტი სარგებელი მიიღოს“.
კონტექსტი:
აშშ-ის პრეზიდენტმა ტრამპმა და რუსმა დიქტატორმა პუტინმა, ალასკაზე პარასკევს გამართული მოლაპარაკებების შემდეგ, შეხვედრა „ძალიან პროდუქტიულად“ შეაფასეს, მაგრამ არ არსებობს არანაირი ნიშანი იმისა, რომ უკრაინაში ომის შეწყვეტის საკითხში ორი ქვეყნის ლიდერებმა პროგრესს მიაღწიეს.
რაც შეეხება უკრაინას, მხარეები შეთანხმებასთან ახლოს არიან, მაგრამ უკრაინის თანხმობა მაინც აუცილებელია. მოლაპარაკებების შემდეგ გამართულ პრესკონფერენციაზე ტრამპმა პირობა დადო, რომ დაუყოვნებლივ დაუკავშირდება უკრაინის პრეზიდენტ ვლადიმირ ზელენსკის და ნატო-ს ხელმძღვანელობას, რათა მათ მოლაპარაკებების მიმდინარეობის შესახებ აცნობოს.